दौंडच्या शेतकरी कुटुंबात जन्म, लग्नानंतर राजकारणात प्रवेश, महापालिका हरल्या, रुपाली चाकणकरांचा संपूर्ण राजकीय प्रवास

वैभव सोनवणे, प्रतिनिधी, पुणे : नाशिकच्या कॅप्टन अशोक खरात भोंदूबाबा प्रकरणात महिला आयोगाच्या अध्यक्षा रुपाली चाकणकर यांची विकेट जाणार हे जवळपास निश्चित झाले आहे. अशोक खरात याच्याशी असलेली विशेष जवळीक तसेच त्याच्या मंदिराच्या ट्रस्टवर चाकणकर या सदस्य असल्याने त्यांची सलगी अधोरेखित होते. सर्वसामान्य महिलांना संविधान शिकवणाऱ्या चाकणकर यांनी जेव्हा भोंदूबाबाची पाद्यपूजा केली, तेव्हा संपूर्ण महाराष्ट्रातून त्यांच्यावर जोरदार टीका झाली. तसेच एका स्थानिक पत्रकाराने भोंदूबाबाचे काळे सत्य जगासमोर आणल्यानंतर रुपाली चाकणकर यांनी संबंधिताला फोन करून गुन्हा दाखल करण्याची धमकी दिल्याचा आरोप आहे. महिला आयोगाच्या अध्यक्षपदाचा त्यांचा प्रवासही अत्यंत वादग्रस्त राहिला आहे. त्यांची राजकारणात एन्ट्री कशी झाली, त्यांना राष्ट्रवादीत प्रदेशाध्यक्षपद कसे मिळाले, आयोगाचे अध्यक्षपद कसे मिळाले, महिला अध्यक्षपदाचा त्यांचा प्रवास कसा राहिला, याबद्दल जाणून घेण्यास अनेक जण उत्सुक आहेत. त्यानिमित्ताने त्यांच्या राजकीय कारकीर्दीवर टाकलेला हा प्रकाशझोत...