Maha Vikas Aghadi : शिवसेना अन् बाबरीमुळे मविआत फूट, मित्र पक्षाने धरली वेगळी वाट

शिवसेनेकडून कार्यकर्त्यांना हिंदुत्वाच्या मुद्द्यावर आवाज उठवण्यास सांगितलं जात आहे. तसंच बाबरी मशिद पाडणाऱ्यांचं अभिनंदन करणाऱ्यांसोबत समाजवादी पार्टी कधीच राहू शकत नाही असं अबू आझमी यांनी सांगितलं. शिवसेना ठाकरे गटाचे नेते मिलिंद नार्वेकर यांनी ६ डिसेंबर रोजी सोशल मीडियावर बाबरी मशिदीसंदर्भात पोस्ट केली होती. ज्यांनी बाबरी पाडली त्यांचा मला अभिमान आहे असं शिवसेना प्रमुख दिवंगत बाळासाहेब ठाकरेंचं वाक्य असलेलं पोस्टर त्यांनी शेअर केलं होतं.

मविआतून बाहेर पडण्याबाबत अखिलेश यादव यांच्या सचिवांशी माझी चर्चा झाली. मी आणि रईस शेख यांचं मविआसोबत न राहण्यावर माझं एकमत आहे. आम्हाला शिवसेनेचं धर्मांध राजकारण कधीच पटलं नाही. सपाचे आम्ही दोन आमदार स्वतंत्र बसू असं अबू आझमी यांनी स्पष्ट सांगितलं.