फलटण डॉक्टर मृत्यू प्रकरण, अटकेनंतर PSI गोपाल बदणेची पहिली प्रतिक्रिया, नक्की काय म्हणाला?

शुक्रवारी पहाटे पोलिसांनी आरोपी प्रशांत बनकरला अटक केली होती. यानंतर सातारा पोलीस पीएसआय बदणेच्या मागावर होते. पंढरपूर पासून पुण्यापर्यंत त्याचा शोध घेतला जात होता. बदणे याचं शेवटचं लोकेशन पंढरपूरमध्ये आढळलं होतं. त्यामुळे तो पंढरपुरात लपला असावा, असा पोलिसांचा अंदाज होता. त्या अनुषंगाने पोलीस तपासही करत होते. दरम्यान, शनिवारी रात्री उशिरा PSI गोपाल बदणे हा स्वत:हून फलटण पोलीस ठाण्यात हजर झाला आहे.

गोपाल बदणे याने आपल्यावर चार वेळा लैंगिक अत्याचार केला, असा आरोप मयत महिला डॉक्टरने केला होता. त्यामुळे बदणे हा महिलेच्या आत्महत्या प्रकरणात मुख्य आरोपी असल्याचं बोललं जात होतं. आता अखेर त्याला अटक केली आहे. पण अटकेनंतर बदणे यानं पहिली प्रतिक्रिया दिली आहे. "मी प्रामाणिक आहे, पोलीस प्रशासनावर माझा विश्वास" अशी एका वाक्यात बदणे याने प्रतिक्रिया दिली आहे.

रात्री उशिरा बदणेला अटक केल्यानंतर त्याची वैद्यकीय तपासणी करण्यात आली. वैद्यकीय तपासणीस घेऊन जात असताना काही प्रसारमाध्यमांनी त्याला प्रतिक्रिया विचारली. यावेळी त्याने आपण प्रमाणिक असून पोलीस प्रशासनावर आपला विश्वास असल्याचं म्हटलं आहे.