अप्रतिम! 21 हजार शर्टच्या बटनांपासून साकारण्यात आली छत्रपती शिवरायांची प्रतिमा, सोलापुरातील चित्रकाराची कमाल

सोलापूर : महाराष्ट्राच्या अस्मितेचा, अभिमानाचा आणि इतिहासाचा सोनेरी दिवस म्हणजे 19 फेब्रुवारी. यंदाच्या वर्षी छत्रपती शिवाजी महाराजांची 395 वी जयंती आहे. छत्रपती शिवाजी महाराजांच्या जयंतीनिमित्त हा दिवस दरवर्षी मोठ्या थाटामाटात आणि जल्लोषात साजरा केला जातो. छत्रपती शिवाजी महाराज यांच्या जयंतीनिमित्त सोलापूरच्या एका चित्रकाराने चक्क शर्टाच्या बटनांपासून छत्रपती शिवाजी महाराजांची प्रतिमा साकारून अनोखी मानवंदना दिली आहे. ही प्रतिमा साकारण्यासाठी किती दिवसांचा कालावधी लागला, किती शर्टाचे बटन वापरण्यात आले? या संदर्भात अधिक माहिती चित्रकार विपुल मिरजकर यांनी Local 18 शी बोलताना दिली.

सोलापुरात छत्रपती शिवरायांना जयंतीनिमित्त आगळ्यावेगळ्या पद्धतीने मानवंदना देण्यात आली आहे. 21000 शर्टच्या बटनांपासून छत्रपती शिवाजी महाराजांची प्रतिमा साकारून ही मानवंदना देण्यात आली आहे. सोलापूरचा सुप्रसिद्ध कलाकार विपुल मिरजकर याने ही प्रतिमा साकारली आहे.

ही प्रतिमा साकारण्यासाठी चार दिवसांचा कालावधी लागलेला असून विविध रंगांच्या शर्टच्या बटनांचा वापर ही प्रतिमा साकारण्यासाठी करण्यात आला आहे. 4 × 5 फूटची ही कलाकृती आहे. ही कलाकृती साकारत असताना विपुल मिरजकर यांच्या आईने सुद्धा मदत केलेली आहे. तसेच या कलाकृतीसाठी बसवराज कडगंची आणि पंकज शहा यांनी देखील सहकार्य केले आहे.