तृतीयपंथीयाच्या घरी विराजमान झाले बाप्पा, पाहा गणरायाकडं केली कोणती मागणी?

गेल्या चार वर्षापासून फरा यांच्याकडे बाप्पा येतो. सकाळी उठून त्या सारा स्वयंपाक स्वतःच्या हाताने बनवतात. त्यानंतर रीतसर पूजा करतात असे त्या सांगतात. पूजा झाल्यानंतर त्या त्यांच्या आजुबाजूच्या मंडळींसह आरती करतात. बाप्पाच्या स्वागतासाठी चाळीत आजूबाजूला राहणारे सर्वचजण येत असतात त्यानी कधीही मला परक्यासारखे वागवले नाही, असं फरानं सांगितलं.

बाप्पाने  दृष्टी बदलण्याची बुद्धी द्यावी ...

माझ्या आजूबाजूला राहणारे सर्वच जण मला खूप समजून घेतात. मला कधीही त्रास होईल किंवा वाईट वाटेल असे वागत नाहीत. माझ्या जागेची मालकीण आणि मालक तर माझे आई बाबाच आहेत. ते माझ्यावर खूप प्रेम करतात. लहान मुलेही माझ्याकडे खेळत असतात.

मात्र, अजूनही बाहेर पडल्यानंतर आम्हाला तुच्छतेने बघणाऱ्या नजरा आम्हीही पाहत असतो. आता आम्हाला सरकारने सर्वच अधिकार दिले आहेत. आम्हालाही माणूस म्हणून जगण्याचा अधिकार आहे. हे सर्वांना समजण्याची बुद्धी बाप्पाने द्यावी, अशी प्रार्थना करते असं फरा यांनी सांगितलं.