गणेशोत्सवात घ्या नागपूरमधील 'या' 10 गणपतीचे दर्शन; भव्य देखावे फेडतील डोळ्यांचं पारणं

आनंद, उत्साह आणि सर्वत्र जल्लोष निर्माण करत समाज मनामध्ये नवं चेतना निर्माण करणारा सण म्हणजे गणेशोत्सव. बापाच्या आगमनाने भक्तांच्या उत्साहाला उधाण आलं आहे. नागपूर शहरात अनेक गणेश मंडळांनीही भव्य देखावे तयार केले आहेत. त्यामुळे नागपुरातील हे प्रमुख दहा गणपती आवर्जून बघावे असेच आहेत. अश्याच काही मंडळांची माहिती तुम्हाला आज आम्ही देणार आहोत.

नागपूरचा राजा : नागपूर नगरीचा राजा म्हणून प्रख्यात असलेला या गणपतीची सुरुवात सन 1995 साली सुरू झाली. यंदा मंडळाचे हे 28 वं वर्ष आहे. नागपूर शहरातील सर्वात श्रीमंत गणपती म्हणून देखील हा गणपती ओळखला जातो. गणपतीची आकर्षक मूर्ती त्यावर सोन्या चांदीच्या दागिन्यांनी सजलेली मूर्ती मन मोहून टाकणारी आहे.

महालचा राजा : नागपूर शहरातील महाल भागात विराजमान होणारा महालचा राजा हे मंडळ आपल्या नावीन्य पूर्ण देखाव्यांसाठी प्रसिद्ध आहे. यावर्षी या मंडळांने सिंधुदुर्ग जिल्ह्यातील कुडाळ या तालुक्याच्या ठिकाणी असलेला माणगाव येथील यक्षिणी देवी मंदिरची प्रतिकृती साकारली आहे.

दक्षिनामुर्ती गणेश उत्सव मंडळ : नागपुरातील जुन्या मंडळांमधील अग्रणी नाव आणि आपल्या भव्य दिव्य देखाव्यामुळे शहरात प्रसिद्ध असलेल्या दक्षिनामुर्ती गणेश उत्सव मंडळ हे दरवर्षी नावीन्यपूर्ण देखावे साकारत आले आहे. यंदाच्या वर्षी महाराष्ट्रातील साडेतीन शक्तिपीठांचा अप्रतिम देखावा मंडळाने साकारला आहे.

हिलटॉपचा गणपती : नागपूर शहरातील सर्वात मोठी गणेश मूर्ती म्हणून प्रसिद्ध असलेली एकता गणेश उत्सव मंडळाच्या वतीने दरवर्षी मोठ्या उत्साहात विराजमान होणारा हिलटॉपचा राजा यंदा शिवाजी महाराजांच्या रुपात बघायला मिळतो आहे.

संती गणेश उत्सव मंडळ : नागपुरातील प्रमुख मंडळापैकी एक असलेले संती गणेश उत्सव मंडळाने यंदा देखील आपल्या अप्रतिम देखाव्यांची मालिका कायम ठेवत यंदा तामिळनाडू येथील मदुराईच्या मीनाक्षी मंदिराची हुबेहूब प्रतिकृती तयार केली आहे. ज्यामध्ये गणरायासह साक्षात श्री मीनाक्षी देवीच्या दर्शनाचा देखील लाभ नागपूरकरांना घेता येणार आहे.

तात्या टोपे नगर गणेश उत्सव समिती : यंदा छत्रपती शिवाजी महाराजांच्या शिवराज्याभिषेक दिनाचे हे साडेतीनशे वर्ष असल्याने यंदा टाटा टोपे नगर गणेश उत्सव समितीच्या वतीने छत्रपती शिवाजी महाराजांच्या किल्ल्यांच्या प्रतिकृती साकारले आहेत. यामध्ये राजगड आणि रायगड या दोन राजधानींच्या हुबेहूब प्रतिकृती साकारल्या आहेत.

भारत क्रीडा गणेश उत्सव मंडळ : महाल भागात असलेल्या भारत क्रीडा गणेश उत्सव मंडळाच्या वतीने यंदा गोवर्धन पर्वताचा देखावा साकारला आहे. यंदा मंडळाचे हे 48 वे वर्ष असून वृंदावन येथील विविध मंदिरांचा कलाकृती येथे बघायला मिळणार आहे.

मस्कासात गणेश उत्सव मंडळ : नागपूर शहरातील मस्कासात परिसरात असलेल्या मस्कासात गणेश उत्सव मंडळाने यंदा उज्जैन येथील महाकालेश्वर मंदिराचा देखावा साकारला असून यंदाची ही मूर्ती शिवस्वरूपातील आहे.

गणेश टेकडीच्या गणपती : नागपूर शहराचे आराध्य दैवत असलेल्या गणेश टेकडी मंदिर हे तमाम नागपूरकरांचे श्रद्धास्थान आहे. या ठिकाणी भाविकांची मोठी गर्दी पाहायला मिळते.

आदासा गणेश मंदिर : नागपूर जिल्ह्यातील कळमेश्वर तालुक्यातील आदासा येथे हे गणपती मंदिर आहे. अत्यंत प्राचीन असे हे मंदिर आहे. आदासा गणपती विदर्भातील अष्टविनायकापैकी एक म्हणून ओळखला जातो. गणेश उत्सव दरम्यान येथे मोठ्या संख्येने भाविकांची गर्दी होत असते.