लालबागच्या राजाला विसर्जनासाठी उशीर, उद्धव ठाकरे, एकनाथ शिंदे यांचा सुधीर साळवींना फोन

उदय जाधव, प्रतिनिधी, मुंबई: लालबागच्या राजाला गिरगाव चौपाटीवर दाखल होऊन जवळपास ११ तासांहून अधिक काळ लोटला आहे. परंतु अरबी समुद्रात आलेल्या भरतीमुळे राजाचे विसर्जन अद्याप होऊ शकलेले नाही. विसर्जनासाठी आलेले हजारो भाविक अजूनही चौपाटीवर थांबून आहेत. लालबागच्या इतिहासात पहिल्यांदाच विसर्जनासाठी एवढा उशीर झालेला आहे. दरम्यान, विसर्जनासाठी लागलेल्या विलंबाच्या पार्श्वभूमीवर उपमुख्यमंत्री एकनाथ शिंदे आणि शिवसेना पक्षप्रमुख उद्धव ठाकरे यांनी मंडळाचे मानद सचिव सुधीर साळवी यांना फोन करून विसर्जन तयारीची आणि विलंबाच्या कारणांची माहिती घेतली. तसेच कार्यकर्त्यांची काळजी घेण्याचे आवाहन त्यांनी केले आहे.