250 वर्षांची परंपरा असणारा घोराडचा पोळा, पाहा कसा होतो साजरा? Video

बैलांचा पोळा हा संत नामदेव महाराज समाधी मैदानावर तर नंदी पोळा हा विठ्ठल रखुमाई मंदिरासमोर भरतो. पोळा पाहण्यासाठी दूरवरून नागरिक येतात. 250 वर्षांहून अधिक काळापासून ही परंपरा येथे कायम आहे. संत केजाजी महाराजांनी येथील पोळ्याची परंपरा सुरू केल्याचं सांगतिलं जातं. 'हर हर महादेव'च्या जयघोषाने संत नामदेव महाराज समाधी मैदान दुमदुमून जाते.

शेतकरी आपली बैलजोडी सजविल्यानंतर प्रथम विठ्ठल रखुमाई मंदिरासमोर आणतो. मंदिरात असणाऱ्या शिव मंदिरातील नंदीला बेल पत्री वहिल्या जाते. त्यानंतर हनुमान मंदिरात पूजा करून बैल जोडीसह शेतकरी माता मंदिराला प्रदक्षिणा घालतात. त्यानंतर आपली बैलजोडी घेऊन बोर तीरावरून मार्गक्रमण करीत पुंडलिकाच्या मंदिरात दर्शन घेतले जाते. पुढे बैलजोडी संत नामदेव महाराज समाधी मैदानावर पोळ्यात उभी करतात.

सायंकाळी 4 वाजता मंदिरातून भजनी दिंडी टाळ मृदंगाचा निनाद करीत पोळा स्थळी येते. यात शेतकरी नागरिक सहभागी होतात. ही दिंडी पोळ्यात असणाऱ्या बैलजोडीच्या रांगांना पाच प्रदक्षिणा घालतात. मंदिराचे पुजारी पोळ्यात असणाया पाच बैलजोडींची पूजा करतात. त्यानंतर संत नामदेव महाराज समाधी येथे आरती होते. या नंतर मशाल पेटवून पोळ्याची सांगता होते. दिंडी विठ्ठल रखुमाई मंदिरात परत येते, ही येथील धार्मिक परंपरा आहे.