Dombivli: कन्नड भाषेत शिवी का दिली? 8 जणांनी मिळून दोघांना बेदम मारलं, बारबाहेर तुफान राडा VIDEO

पोलिसांनी दिलेल्या माहितीनुसार,  डोंबिवली पश्चिमेकडील रेतीबंदर रोडवर असलेल्या अतिथी बारबाहेर सोमवारी मध्यरात्री १२.३० वाजेच्या सुमारास ही घटना घडली होती.

रेतीबंदर रोडवर असलेल्या अतिथी बारबाहेर मध्यरात्री एका किरकोळ वादातून दोन गटामध्ये वाद झाला. हा सगळा प्रकार सीसीटीव्ही कॅमेऱ्यामध्ये कैद झाला आहे.  बारमध्ये कन्नड भाषेत शिवीगाळ केल्याच्या संशयावरून  एका व्यक्तीने २ तरुणासोबत वाद झाला. त्यानंतर या इसमाने आपल्या ७-८ साथीदारांना बारमध्ये बोलावलं. ७ ते ८ जण जमा झााल्यानंतर या दोन्ही तरुणांना बारच्या बाहेर काढण्यात आलं. बारच्या दारावर दोन्ही तरुणाशी बोलणं सुरू होतं, त्यावेळी अचानक एकाने समोरील तरुणाच्या कानशिलात लगावली. त्यानंतर या टोळक्याने दोन्ही तरुणांना बेदम मारहाण केली.

या टोळक्याने हाती लागेल ते साहित्य उचलून दोघांना मारहाण केली. लोखंडी वस्तू आणि झाडाच्या कुंड्यांचा वापर करण्यात आला. या हल्ल्यात दोन तरुण गंभीर जखमी झाले आहेत. धक्कादायक म्हणजे, या झटापटीत एका तरुणाची ८ ग्रॅम सोन्याची साखळी देखील गहाळ झाली आहे. याप्रकरणी डोंबिवली पश्चिम पोलीस ठाण्यात गुन्हा दाखल करण्यात आला असून, आरोपींचा शोध सुरू आहे.