दरमहा फक्त 36 रुपयांची बचत करुन घ्या टर्म इन्शुरन्स! अडचणीत कुटुंबाला मिळेल मदत 

या सरकारी योजनेअंतर्गत, पॉलिसीधारकाचा मृत्यू झाल्यास, त्याच्या कुटुंबाला 2 लाख रुपयांपर्यंतची आर्थिक मदत दिली जाते. ही मदत कठीण काळात कुटुंबाच्या अनेक गरजा पूर्ण करू शकते. जर कोणत्याही व्यक्तीला या सरकारी योजनेचा लाभ घ्यायचा असेल तर त्याला वार्षिक फक्त 436 रुपये देऊन हा प्लॅन खरेदी करावा लागेल. 436/12=36.3 म्हणजे जर एखादी व्यक्ती दरमहा 36 रुपये देखील वाचवत असेल तर तो त्याचा वार्षिक प्रीमियम सहजपणे भरू शकतो.

18 ते 50 वयोगटातील कोणतीही व्यक्ती हा इन्शुरन्स प्लॅन खरेदी करू शकते. PMJJBY विमा योजनेचा कव्हर कालावधी 1 जून ते 31 मे पर्यंत आहे. म्हणजेच तुम्ही वर्षाच्या कोणत्याही महिन्यात तो खरेदी करू शकता, परंतु तुम्हाला कव्हर फक्त 31 मे पर्यंत मिळेल. तुम्हाला 1 जून रोजी पुन्हा त्याचे नूतनीकरण करावे लागेल. योजनेचा लाभ घेण्यासाठी बँक अकाउंट असणे आवश्यक आहे. तुम्ही या योजनेअंतर्गत नोंदणी करताना ऑटोमॅटिक रिन्यूअल निवडले असेल, तर दरवर्षी 25 मे ते 31 मे दरम्यान तुमच्या अकाउंटमधून पॉलिसीचे 436 रुपये आपोआप कापले जातात.

ही पॉलिसी घेण्यासाठी तुम्हाला कोणत्याही प्रकारच्या वैद्यकीय चाचणीची आवश्यकता नाही. विमा पॉलिसीच्या संमती फॉर्ममध्ये काही आजारांचा उल्लेख असतो. तुम्हाला घोषणापत्रात नमूद करावे लागेल की तुम्ही त्या आजारांनी ग्रस्त नाही आहात. जर तुमची घोषणा चुकीची सिद्ध झाली तर तुमच्या कुटुंबाला या योजनेचा लाभ मिळणार नाही. याशिवाय, या योजनेत विमा प्रीमियम म्हणून जमा केलेल्या रकमेवर कलम 80C अंतर्गत कर सूटचा लाभ देखील मिळू शकतो.

तुम्हाला ही पॉलिसी घ्यायची असेल, तर तुम्ही तुमचे अकाउंट असलेल्या बँकेतून त्याचा फॉर्म मिळवू शकता. या फॉर्मद्वारे, खातेदाराकडून पॉलिसीसाठी त्याच्या खात्यातून पैसे कापण्यास तयार आहे की नाही याची संमती घेतली जाते. यानंतर, बँक उर्वरित सर्व काम करते. याशिवाय, काही बँकांनी नेट बँकिंगद्वारे आणि काहींनी एसएमएसद्वारे या पॉलिसीची सुविधा देण्यास सुरुवात केली आहे.

संबंधित व्यक्तीचा विमा ज्या बँकेत होता त्या बँकेत नामनिर्देशित व्यक्तीला दावा करावा लागतो. डिस्चार्ज पावतीसोबत मृत्यू प्रमाणपत्र आणि इतर आवश्यक कागदपत्रे सादर करावी लागतील. नियमांनुसार, दुर्घटना झाल्यापासून 30 दिवसांच्या आत दावा करणे आवश्यक आहे.