Gold Price Prediction : सोन्याचा दर रिव्हर्स गिअर टाकणार! 45 वर्षापूर्वींचा इतिहास पुन्हा घडणार? एक्सपर्ट म्हणतात, आता...

1980 मध्ये विक्रमी उच्चांक गाठल्यानंतर, पुढील वर्षांत सोन्याच्या किमती निम्म्याहून अधिक घसरल्या. यामुळे सोन्याच्या सध्याच्या तेजीनंतर तीव्र घसरण होऊ शकते का अशी चिंता निर्माण झाली आहे. दिवाळीच्या दरम्यानही सोन्याच्या दरात काही प्रमाणात घसरण झाली होती.

जानेवारी 1980 मध्ये, सोन्याच्या किमती त्यांच्या सर्वकालीन उच्चांकावर पोहोचल्या. त्यावेळी सोने जवळजवळ 850 अमेरिकन डॉलर्स प्रति औंसवर पोहोचले. त्यावेळी हा एक विक्रम होता. (महागाईनुसार समायोजित केल्यास, हा आकडा 3400 डॉलर प्रति औंस जवळ होता. हा दर या वर्षी सोन्याने ओलांडला.) मात्र, 1982 ते 1985 दरम्यान, सोन्याच्या किमती प्रति औंस 300-400 डॉलरपर्यंत घसरल्या आणि दशकाच्या अखेरीस (1989) किंमती प्रति औंस 380-420 डॉलर दरम्यान स्थिर राहिल्या. याचा अर्थ असा की, तीव्र वाढीनंतर, सोन्याच्या किमतीत सुधारणा दिसून आली, जी मागील पातळीच्या निम्म्यापेक्षा कमी झाली.

CNBC TV18 सोबत बोलताना, कामाख्या ज्वेल्सचे सह-संस्थापक मनोज झा म्हणाले की, सोने "बबल झोन" मध्ये प्रवेश करत असल्याचे दिसून येते. येत्या काही महिन्यांत नफा-वसुलीचा काळ येण्याची शक्यता आहे. झा यांच्या मते, "सोने एका वळणावर पोहोचले आहे. गुंतवणूकदारही थोडे चिंतेत आहेत. यापूर्वी, 1979-80 मध्ये आणि पुन्हा 2010-11 मध्ये सोन्यात लक्षणीय वाढ झाली. मात्र, त्या उच्चांकांनंतर, त्यात लक्षणीय घट झाली. त्यामुळे इतिहासाची पुनरावृत्ती होण्याची शक्यता असल्याचे त्यांनी म्हटले.

सोनं सध्या ओव्हरबॉट झाले आहे. मात्र,नजिकच्या काळात सोन्याच्या किमतीत सुमारे 300-400 डॉलर प्रति औंसची घसरण होईल असे झा यांचे मत आहे. मात्र, जोपर्यंत कोणतेही महत्त्वपूर्ण संकेत मिळत नाहीत तोपर्यंत ही घसरण नवीन गुंतवणूकदारांना आकर्षित करेल, ज्यामुळे सोन्याला त्याची दीर्घकालीन कामगिरी टिकवून ठेवता येईल, असे म्हटले.