वर्षाच्या शेवटच्या दिवशीही शेअर बाजारात घसरण सुरूच होती. सुरुवातीच्या व्यवहारात सेन्सेक्स जवळपास 700 अंकांनी घसरला. त्याच वेळी, निफ्टी जवळपास 180 अंकांनी घसरला आणि 23,500 च्या खाली गेला. सर्वात मोठी घसरण आयटीच्या शेअर्समध्ये दिसून आली. आज पहिल्या एक तासात शेअर बाजारातील गुंतवणूकदारांचे साडेतीन लाख कोटी रुपयांचे नुकसान झालं. बीएसईवर लिस्टेड कंपन्यांचे मार्केट कॅप 437.82 लाख कोटी रुपयांवर घसरले, जे सोमवार, 30 डिसेंबरला 441.35 लाख कोटी रुपये होते.

ब्रॉडर मार्केटमध्ये मोठ्या प्रमाणात विक्री झाल्याचं दिसून आलं. सकाळी 10.20 च्या सुमारास बीएसई मिडकॅप निर्देशांक 0.81 टक्क्यांनी आणि स्मॉलकॅप निर्देशांक 0.38 टक्क्यांनी घसरला. कॅपिटल गुड्स वगळता बीएसईचे सगळे सेक्टोरल इंडेक्स लाल रंगात आहेत, सोप्या भाषेत सांगायचं तर मार्केट कोसळलं आहे. आयटी निर्देशांक अडीच टक्क्यांहून अधिक घसरला होता.

तज्ज्ञांच्या मते, FIIs मध्ये सर्वाधिक विक्री झाली आहे. त्याचे परिणाम जागतिक आणि राष्ट्रीय दोन्ही बाजारपेठांवर दिसून आले. मागच्या 2 आठवड्यापासून गुंतवणूकदार शेअर मार्केटमधून आपले पैसे काढून घेत आहेत. 15,000 कोटी रुपयांहून अधिक पैसे हे शेअर मार्केटमधून काढले आहेत. त्यामुळे त्याचा परिणाम दिसून आला आहे.