Success Story : सॉफ्टवेअर इंजिनिअरने नोकरी सोडली, पारंपरिक हस्तकलेचा सुरू केला व्यवसाय, वर्षाला 50 लाखांची उलाढाल

सुष्मिता यांनी सांगितलं की, 2020 साली त्यांनी विश्वकर्मा इन्स्टिट्यूट ऑफ टेक्नॉलॉजी (VIT) पुणे येथून सॉफ्टवेअर इंजिनिअरिंगची पदवी पूर्ण केली. लहानांपासून समाजसेवेची आवड असल्याने त्यांनी नोकरी करण्याचा विचार न करता समाजासाठी काहीतरी करण्याचं ठरवलं. त्यातूनच गुल्लकारी या व्यवसायाचा जन्म झाला. त्यांचे स्वतःचे शिक्षण सॉफ्टवेअर क्षेत्रातून झाले असल्याने त्यांनी गुल्लकारी नावाचे एक प्लॅटफॉर्म निर्माण केले आहे. या प्लॅटफॉर्मवर देशभरातील कारागीर आपल्या वस्तू विकू शकतात. या प्लॅटफॉर्ममुळे देशभरातील अनेक कारागिरांच्या हाताला रोजगार मिळाला असून, ते स्वतः तयार केलेल्या वस्तू थेट येथे विकू शकतात.

सुष्मिता यांनी सांगितले की, त्यांनी 2021 साली सुरुवातीला गुल्लक नावाचा प्लॅटफॉर्म सुरू केला होता. या प्लॅटफॉर्मच्या माध्यमातून देणगीदारांकडून थोडेथोडे पैसे जमा करून ते सामाजिक कामासाठी वापरले जात होते. मात्र काही काळानंतर लोकांना दान देण्यापेक्षा त्यांना आत्मनिर्भर बनवणे अधिक गरजेचे असल्याचे सुष्मिता यांच्या लक्षात आले. यासाठी नेमके काय करता येईल, याचा अभ्यास करत त्यांनी देशभरात जवळपास 10 हजार किलोमीटरचा प्रवास केला.