तीच चव, तोच स्वाद, 50 वर्षांनंतरही लोकांचा तितकाच प्रतिसाद; साबुदाणा वड्यासाठी प्रसिद्ध असलेलं दादरमधील फेमस ठिकाण

मुंबई : दादरमध्ये एकाहून एक सरस अशा महाराष्ट्रीयन खाद्यपदार्थांची रेलचेल असणारी ठिकाणे आहेत. त्यातलेच एक म्हणजे प्रकाश शाकाहारी उपहार गृह. याठिकाणी कोथिंबींर वडी, मिसळ, साबुदाना खिचडी, साबुदाना वडे, वांगी पोहे असे चविष्ट आणि तोंडाला पाणी आणणारे पदार्थ आहेत.

इथला साबुदाना वडा आणि त्यासोबतची चटनी म्हणजे निव्वळ सुख आहे, असं दादरकर म्हणतात. दादर पश्चिम येथील गोखले रोडवर असणारे हे प्रकाश उपहार केंद्र शाकाहारी पदार्थांसाठी खूप फेमस आहे. इथे थंड पेयांमध्ये मिळणारे पियुष्य अत्यंत लोकप्रिय आहे. प्रकाश उपहार केंद्रात मिळणारे साबुदाणा वडे ही प्रकाश उपहार केंद्राची ओळख आहे.

1971 ला सुरू झालेले प्रकाश उपहार केंद्र आजही त्यांची चव टिकवून आहे. गेले 53 वर्ष दादरकरांना शुद्ध शाकाहारी पदार्थ खायचे असतील तर ते हमखास इथेच येतात. या उपहार केंद्रात आल्यानंतर तिथलं वातावरण आज मराठी माणसाला आवडेल असंच आहे. उपहार केंद्रातले सगळेच लोक येणाऱ्या गिऱ्हाईकांशी अत्यंत आपुलकीने बोलतात. त्यांची आणखी एक विशेषत: म्हणजे ते कोणतेच पदार्थ बनवून ठेवत नाहीत तर ऑर्डर आल्यानंतरच तो पदार्थ बनवला जातो. इथे मिळणारे मिसळ पुरी, थालीपीठ, कोथिंबीर वडी ग्राहकांना खूप आवडतात. यांची किंमत सुद्धा अगदी कमी आहे. साबुदाणा वड्यांची किंमत तर फक्त 60 ते 70 रुपये असून त्यांची चव दादरकरांमध्ये खूप प्रसिद्ध आहे.