गणपतीची प्राणप्रतिष्ठा ते विसर्जनाची अत्यंत अनोखी पद्धत, तुम्ही पाहिली नसेल, मुंबईतील महिलेची कल्पना, VIDEO

लोकल18 शी बोलताना त्यांनी सांगितले की, मागील 8 वर्षांपासून मी अशा प्रकारचा गणपती बनवते आहे. इको फ्रेंडली गणपती या विषयावर चर्चा निघाली आणि आपण जर का खव्याचा किंवा गूळ हळदीचा किंवा पेढ्याचा असा गणपती बनवला आणि नंतर त्याच दुधामध्ये विसर्जन केलं मग त्याची खीर बनवून सगळ्यांना दिली तर, असे बोलता बोलता सहज माझ्या तोंडातून निघून गेलं. तसेच गणपतीच्या प्राणप्रतिष्ठेच्या वेळी आपण जी त्याच्यामध्ये श्री गणेशाची ऊर्जा बोलावत असतो ती विसर्जन करून मातीत घालवण्याऐवजी मूर्ती रुपी गणपतीच्या प्रसादाद्वारे ती ऊर्जा आपण आपल्यामध्ये सामावून घेतली तर नकळत होणारा श्री गणेशाचा अपमान पण थांबेल आणि शिवाय श्री गणेशाच्या ऊर्जेने आणि त्याच्या आशीर्वादाने आपलेही कल्याण होईल, असा विचार मांडला.

मग कुठेतरी आपणच आपल्या आराध्याचा अपमान तर करत नाही ना, अशी शंका येते. म्हणूनच मी ही कल्पना सहज बोलून दाखवली आणि गेली 8 वर्षे माझ्याबरोबरच माझे सुमारे 25-30 विद्यार्थी ही कल्पना नियमितपणाने राबवत आहेत आणि त्यांनाही त्याच्या खूप फायदा झाला आहे.

खव्याचा गणपती बनवायचा. वेलचीच्या दाण्यांचे डोळे बनवायचे. बासमती तांदुळाचे दात बनवायचे आणि कधी गुलाबाच्या पाकळीचा तर कधी केशरांच्या काड्यांचा मुकुट बनवायचा. मग या बाप्पाची तांदूळ आणि वर प्रतिष्ठापना करायची. नेहमी जसे गणपतीचे पूजन करतो तशीच पूजा करायची, असेही त्यांनी सांगितले.

गणपतीचा किंवा कोणत्याही पूजेचा महाप्रसाद हा घेण्यासाठी सगळे लोक उत्सुक असतात कारण त्या महाप्रसादात त्या इष्ट देवतेची ऊर्जा सामावलेली असते, असा एक समज असतो. हा महाप्रसाद त्या इष्टदेवतेला देऊन नंतर सगळ्यांना वाटला जातो, अशी माहिती त्यांनी दिली.