ती कचऱ्यातलं अन्न खाऊन जगत होती, तिने एक शब्द उचारला अन् लेकीची भेट झाली, सिनेमाला लाजवेल अशी स्टोरी!

मुंबई: एका शब्दानं आख्खं आयुष्य बदलू शकतं, यावर कुणाचाच विश्वास बसणार नाही. सात वर्षांपूर्वी बेपत्ता झालेल्या एका महिलेने अनोळखी रस्त्यांवर, उपाशीपोटी जगण्याचा संघर्ष केला. रायगडच्या गल्लीबोळांत भटकताना, तिला स्वतःचं नाव, गाव काहीच माहिती नव्हतं. पण एक शब्द उच्चारला आणि सगळं आयुष्यच बदलून गेलं. ‘बदामी’ या एका शब्दानं चक्रं फिरली आणि 7 वर्षांपूर्वी ताटातूट झालेल्या मुलीला लेकीला आपली आई सापडली. ही एखाद्या चित्रपटातील कथानकासारखीच घटना वाटेल. परंतु, ही कुण्या चित्रपटाची कथा नसून ही एक सत्यकथा आहे. याबाबतच लोकल18 च्या माध्यमातून जाणून घेऊ.

पनवेल जवळील वांगणी गावामध्ये सोशल अँड एवेंजिकल असोसिएशन फॉर लव (SEAL) ही संस्था आहे. कर्नाटकातील बदामी येथील रहिवासी असलेल्या कस्तुरी पाटील (50 वर्षे) या महिलेला काही महिन्यांपूर्वी रायगड जिल्ह्यातील पाली परिसरातून SEAL या बेघरांसाठी काम करणाऱ्या आश्रयगृहात आणण्यात आले. त्यावेळी तिची अवस्था इतकी बिकट होती की, ती स्त्री आहे की पुरुष, हेही ओळखता येत नव्हतं. मात्र हळूहळू तिला थोडे बळ मिळालं आणि तिने आपलं नाव सांगितलं.

या संस्थेच्या समाजसेवकांनी कस्तुरीला मदतीचा हात दिला आणि तिच्या विस्कटलेल्या आयुष्याला एक नवी दिशा दिली.

कस्तुरीचा हा प्रवास कसा होता हे SEAL आश्रमाचे सदस्य बीजू सॅम्युएल यांनी सांगितला आहे. SEAL संस्थेचे सदस्य बीजू सॅम्युएल म्हणाले, "आम्हाला कस्तुरीच्या कुटुंबाविषयी कोणतीही माहिती नव्हती. पण याच आठवड्यात तिने 'बदामी' असा शब्द उच्चारला. आमच्या काही कार्यकर्त्यांना माहीत होते की, बदामी हे कर्नाटकातील बागलकोट जिल्ह्यातील महत्त्वाचे शहर आहे. त्यामुळे आम्ही तातडीने बदामी पोलीस ठाण्याशी संपर्क साधला आणि कस्तुरीचे फोटो त्यांना व्हॉट्सअ‍ॅपवर पाठवले."