'आमचं वर्ष फुकट घालवलं...', केस न कापल्याची भयानक शिक्षा, मुंबईच्या नामांकित शाळेचं संतापजनक कृत्य

मुंबईतील चर्नी रोड येथील एक हायस्कूलमध्ये शिस्तीच्या नावाखाली एक धक्कादायक प्रकार घडला आहे. शाळेने ठरवून दिलेल्या नियमांनुसार केस कापले नाहीत, या कारणावरून अनेक विद्यार्थ्यांना चक्क परीक्षेला बसू न दिल्याचा आरोप पालकांनी केला आहे. या प्रकारामुळे संतप्त झालेल्या पालकांनी शाळेच्या गेटवरच गोंधळ घातला असून या संपूर्ण घटनेचा व्हिडीओ इन्स्टाग्रामवर व्हायरल झाल्यानंतर शिक्षण क्षेत्रात मोठी चर्चा सुरू झाली आहे.

मिळालेल्या माहितीनुसार, शाळेने विद्यार्थ्यांसाठी काही विशिष्ट नियम लागू केले आहेत. परीक्षेच्या दिवशी सकाळी जेव्हा विद्यार्थी शाळेत पोहोचले, तेव्हा शिक्षकांनी त्यांच्या केसाची तपासणी केली. ज्या विद्यार्थ्यांचे केस नियमापेक्षा लांब होते किंवा ज्यांची हेअरस्टाईल अयोग्य वाटली, अशा विद्यार्थ्यांना वर्गाबाहेर काढण्यात आले. पालकांचा आरोप आहे की, विद्यार्थ्यांना परीक्षेला बसू देण्याऐवजी त्यांना वर्गाबाहेर बसवण्यात आले, ज्यामुळे त्यांची महत्त्वाचा पेपर हुकला.

केस कापले नाहीत म्हणून मुलांची वर्षभराची मेहनत वाया घालवणार का? असा संतप्त सवाल एका पालकाने व्हिडिओमध्ये विचारला आहे. पालकांच्या मते शिस्त लावण्याचे इतरही मार्ग असू शकतात, पण परीक्षेला बसू न देणे हे विद्यार्थ्यांच्या मानसिकतेवर आणि शैक्षणिक भवितव्यावर परिणाम करणारे आहे.

इन्स्टाग्रामवर हा व्हिडिओ व्हायरल झाल्यानंतर नेटिझन्सनी शाळेवर सडकून टीका केली आहे. अनेकांनीही यावर नाराजी व्यक्त केली असून, मुंबई महापालिका आणि शिक्षण विभागाने या प्रकरणाची दखल घेण्याची मागणी होत आहे. दरम्यान या व्हिडीओ व्हायरल झाल्यानंतर देखील शाळेकडून अद्याप कोणतीही प्रतिक्रिया समोर आली नाही.