Vasai Accident: आधी पायी चालणार्‍याला उडवलं, मग लोखंडी बॅरिकेड्सला धडक; भीषण अपघातात तिघांचा जागीच मृत्यू

नायगाव पोलिसांनी माध्यमांना दिलेल्या माहितीनुसार, शुक्रवारी रात्री उशिरा दोन तरूण बाईकवरून मुंबईकडून नालासोपाऱ्याच्या दिशेने येत होते. बाईकचा स्पीड जास्त असल्यामुळे तो नियंत्रणाच्या बाहेर होता. चिंचोटी परिसरातील साधना हॉटेल जवळ 19 वर्षीय ईश्वर साव हा तरूण रस्ता ओलांडत असताना मुंबईवरून नालासोपाऱ्याच्या दिशेने शाहरूख आणि अर्जुन यांची बाईक भरधाव वेगाने येत होती. त्यांच्या बाईकचा वेग नियंत्रणात येण्याच्या पलीकडचा होता. बाईकचा वेग नियंत्रणाबाहेर असल्यामुळे भरधाव वेगाने येणाऱ्या या बाईकने ईश्वरला धडक दिली. या धडकेमध्ये ईश्वर साव हा तरूण गंभीर जखमी होता. पण वेळेवर उपचार न मिळाल्याने त्याचा जागीच मृत्यू झाला.

या अपघातामध्ये शाहरूख आणि पाठी बसलेला अर्जुन हे दोन्हीही तरूण गंभीर जखमी झाले होते. त्यांना सुद्धा वेळेवर उपचार न मिळाल्यामुळे जागीच मृत्यू झाला आहे. प्रत्यक्षदर्शींचं म्हणणं आहे की, अपघातानंतर या तरूणांची बाईक बऱ्याच अंतर दूर गेली. धडकेनंतर मोटारसायकल रस्त्यावरील लोखंडी बॅरिकेड्सवर आदळली. घटनेनंतर पोलीस लगेचच घटनास्थळी दाखल झाले. पोलिसांनी तिघांचेही मृतदेह ताब्यात घेतले असून लगेचच शवविच्छेदनासाठी पाठवण्यात आले आहे. दरम्यान, पोलिसांनी निष्काळजीपणे आणि भरधाव वेगात वाहन चालवून स्वत:सह इतरांच्या मृत्यूस कारणीभूत ठरल्यामुळे प्रकरणी शाहरुख खान वर गुन्हा दाखल केला असून पुढील तपास करत आहे.