Kurla Station : कुर्ला जंक्शनचा चेहरामोहरा बदलणार! रेल्वे स्थानक सोडताच प्रवाशांना थेट बेस्टचा मार्ग मिळणार; असा आहे नवा प्लॅन

रेल्वे स्थानकाबाहेर रिक्षा, फेरीवाले, अनधिकृत दुकाने आणि मोठ्या प्रमाणातील गर्दीमुळे बेस्ट बसला मार्ग काढणे कठीण होते. या समस्येवर तोडगा काढण्यासाठी कुर्ला पूर्वेकडे ठाण्याच्या धर्तीवर सॅटिस उभारण्यात येणार आहे.

या सॅटिसवरून केवळ बेस्ट बसचीच वाहतूक केली जाणार असून त्यामुळे बसचा प्रवास कोंडीमुक्त होणार आहे. मुंबई महापालिका आयुक्त भूषण गगराणी यांनी एल वॉर्डला भेट देऊन या प्रकल्पाची पाहणी केली असून कामाला गती देण्याचे निर्देश दिले आहेत. कुर्ला पूर्वेकडील बेस्ट बस आगार ते एस. जी. बर्वे मार्गादरम्यान सुमारे अर्धा किलोमीटरपेक्षा अधिक लांबीचा हा सॅटिस पूल असणार आहे. यासाठी लवकरच निविदा प्रक्रिया सुरू केली जाणार आहे.

सध्या या परिसरात मोठ्या आणि लांब बसगाड्यांना वळण घेणे अवघड जाते. पावसाळ्यात परिस्थिती आणखी गंभीर होते. सॅटिस उभारल्यानंतर बस थांबेही त्यावरच तयार केले जातील. रेल्वे स्थानकातून बाहेर पडताच प्रवाशांना सॅटिसखाली बस सेवा उपलब्ध होईल.