ठाकरे गटात नाराजीनाट्य, शिवसेनेच्या घडामोडी वाढल्या, महापौर निवडीआधीच वादाची ठिणगी

मुंबई महानगरपालिकेच्या निवडणुकांनंतर महायुतीत महापौर पदावरून रस्सीखेच सुरू आहे. अडीच वर्षे महापौर पद मिळावं, यासाठी एकनाथ शिंदे प्रयत्न करत आहेत. मात्र अद्याप यावर काहीच तोडगा निघाला नाही. एकीकडे महायुतीतील वाद सुरू असताना महापौर निवडणुकीच्या आधी शिवसेना ठाकरे गटातील अंतर्गत धुसफूस चव्हाट्यावर आली आहे. माजी महापौर किशोरी पेडणेकर यांची पालिकेतील गटनेते पदी वर्णी लावण्यात आल्यानंतर पक्षात नाराजीचा सूर उमटला आहे. विशेषतः सर्व महत्त्वाची पदे 'वरळी' विधानसभा मतदारसंघातच का? असा संतप्त सवाल आता शिवसैनिकांकडून विचारला जात आहे.