Water Supply : मुंबईत पाणीबाणी, 24 तासांसाठी पाणीपुरवठा राहणार बंद, कधी आणि कुठं?

मुंबई : मुलुंड (पश्चिम) येथील 2400 मिलीमीटर व्यासाच्या वैतरणा मुख्य जलवाहिनीवरील 12 जलजोडण्या या 2750 मिलीमीटर व्यासाच्या अप्पर वैतरणा मुख्य जलवाहिनीवर स्थलांतरित करण्याचे कामकाज हाती घेण्यात आले आहे. तसेच भांडुप (पश्चिम) येथील खिंडिपाडा परिसरातील 2400 मिलीमीटर व्यासाच्या वैतरणा जलवाहिनीस लोखंडी झाकण बसविण्याचे नियोजन करण्यात आले आहे. स्थलांतरण आणि दुरुस्ती कार्यवाही मंगळवार, दिनांक 27 जानेवारी रोजी सकाळी 10 वाजेपासून बुधवार, दिनांक 28 जानेवारी रोजी सकाळी 11.00 वाजेपर्यंत करण्यात येणार आहे. या 24 तासांच्या कालावधीत बृहन्मुंबई महानगरपालिकेच्या एस व टी विभागातील काही भागांमध्ये तसेच ठाणे शहरातील काही भागांमध्ये पाणीपुरवठा बंद राहणार आहे.