Congress : मोठी बातमी! अशोक चव्हाणांनंतर काँग्रेसचा आणखी एक बडा नेता भाजपच्या संपर्कात असल्याची चर्चा

दरम्यान दुसरीकडे काँग्रेसचे ज्येष्ठ नेते कमलनाथ हे भाजपमध्ये प्रवेश करणार असल्याची जोरदार चर्चा सुरू आहे. ‘काँग्रेसमध्ये मी एकच कमल आहे’ असं आपल्या नावाचा उल्लेख करताना एकदा काँग्रेस नेते कमलनाथ यांनी गंमतीमध्ये म्हटलं होतं. कमळ हे भाजपचं निवडणूक चिन्ह आहे. कमनाथ हे भाजपमध्ये प्रवेश करणार असल्याची जोरदार चर्चा सध्या राजकीय वर्तुळात सुरू आहे. जर ही शक्यता खरी ठरली तर मध्यप्रदेशच्या राजकारणामध्ये काँग्रेसला मोठा धक्का बसू शकतो. कमलनाथ यांनी 1980 साली पहिल्यांदा लोकसभेची निवडणूक लढली होती. तेव्हापासून ते आतापर्यंत कमलनाथ कायम काँग्रेस आणि गांधी परिवारासोबत राहिले आहेत, त्यांनी इंदिरा गांधी, संजय गांधी, राजीव गांधी, सोनिया गांधी आणि आता राहुल गांधी यांच्यासोबत काम केलं आहे. तसेच गांधी कुटुंबाचे विश्वासू अशी देखील त्यांची ओळख आहे.

समोर येत असलेल्या माहितीनुसार कमलनाथ यांना राज्यसभेत जाण्याची इच्छा होती. मात्र काँग्रेसकडून यावेळी राज्यसभेच्या उमेदवारीची संधी अशोक सिंह यांना देण्यात आली. अशोक सिंह हे कमलनाथ यांचे पक्षांतर्गत स्पर्धक दिग्विजय सिंह यांच्या जवळचे आहेत. दुसरीकडे गेल्या काही दिवसांपासून कमलनाथ हे आजारी देखील आहेत, अशा परिस्थितीमध्ये आपल्या मुलाचं राजकीय भविष्य मजबूत बनाव अशी त्यांची इच्छा असू शकते. काँग्रेसकडून ज्या पद्धतीनं सध्या लोकसभा निवडणुकीची तयारी सुरू आहे, त्यावर देखील कमलनाथ हे नाराज असल्याचं बोललं जात आहे.