Dawood Ibrahim : दाऊद मेला की जिवंत? ती बातमी खरी की खोटी? नवी माहिती समोर, छोटा शकील म्हणाला...

दाऊद इब्राहिमवर विषप्रयोग झाला असून त्याची प्रकृती गंभीर असल्याची माहिती समोर आली होती. पण हे वृत्त छोटा शकीलने फेटाळलं आहे. 'दाऊद जिवंत आणि निरोगी आहे. ही फेक न्यूज पाहून मलाही धक्का बसला. काल मी त्याला अनेकदा भेटलो,' असं शकीलने न्यूज18 शी बोलताना सांगितलं.

काय होती बातमी?

माध्यमांनी दिलेल्या वृत्तानुसार, दाऊद इब्राहिमला गेल्या दोन दिवसांपासून कराचीतील रुग्णालयात दाखल करण्यात आलंय. त्यामुळे रुग्णालयात कडक सुरक्षा व्यवस्था ठेवण्यात आली आहे. दाऊदला कोणीतरी विष दिल्याचा दावा केला जात होता. सोशल मीडियावर दाऊदबाबतच्या बातम्या मोठ्या प्रमाणावर व्हायरल होत असून, त्यानुसार विविध प्रकारचे अंदाज बांधले जात आहेत.

भारतातील मोस्ट वॉन्टेड गुन्हेगारांपैकी एक असलेल्या दाऊद हा संघटित गुन्हेगारी, दहशतवाद आणि अंमली पदार्थांची तस्करी यासह विविध गुन्हेगारी कारवायांशी संबंध आहे. एवढेच नाही तर 1993मधील मुंबई बॉम्बस्फोटाचा तो मास्टरमाईंड आहे. त्या हल्ल्यात 250 हून अधिक जणांना आपला जीव गमवावा लागला होता आणि हजारो लोक जखमी झाले होते.

सध्या मुंबई पोलिसांसह भारतातील इतर तपास यंत्रणा दाऊदशी संबंधित या नवीन अपडेटबाबत अधिक माहिती गोळा करण्यात व्यस्त आहेत. या पूर्वी, जानेवारी महिन्यामध्ये दाऊदची बहीण हसीना पारकरच्या मुलाने एनआयएला सांगितलं होतं की, दुसऱ्या लग्नानंतर दाऊद कराचीमध्ये राहत होता. एनआयएने दाऊदविरुद्धच्या आरोपपत्रात असं म्हटलं आहे की, दाऊद आणि त्याचे प्रमुख साथीदार पाकिस्तानातील कराची विमानतळ नियंत्रित करतात.