Explainer: दिल्लीत ज्यावरून राडा झाला, निवडणूक आयोगही नडतंय, ते राहुल गांधींनी केलेले आरोप कोणते?

इंडिया आघाडीच्या नेत्यांनी आणि कार्यकर्त्यांनी 'मत चोरी' विरोधात संसद भवनाकडे मोर्चा काढण्याचा प्रयत्न केला, परंतु दिल्ली पोलिसांनी हा मोर्चा संसद भवनापासून काही अंतरावरच अडवला. पोलिसांनी लावलेले बॅरिकेड्स हटवून पुढे जाण्याचा प्रयत्न केल्याने वातावरण अधिकच तणावपूर्ण झाले.

आंदोलनादरम्यान, प्रियंका गांधी, राहुल गांधी, सुप्रिया सुळे यांच्यासह इतर नेत्यांनी केंद्र सरकार आणि निवडणूक आयोगावर जोरदार टीका केली. प्रियंका गांधी यांनी "केंद्र सरकार घाबरले आहे," अशी थेट टीका केली. देशातील जनतेचा विश्वास गमावलेल्या सरकारला आता लोकशाहीच्या सर्व संस्थांचा दुरुपयोग करावा लागत आहे, असे त्या म्हणाल्या.

या ऐतिहासिक आंदोलनात ‘इंडिया’ आघाडीतील विविध पक्षांचे सुमारे ३०० खासदार सहभागी झाले होते. अनेक खासदारांनी बॅरिकेड्सवर चढून सरकारविरोधात जोरदार घोषणाबाजी केली. विरोधकांची एकजूट आणि त्यांचा आक्रमक पवित्रा पाहून पोलिसांनी धरपकड सुरू केली. या कारवाईमुळे विरोधी नेत्यांनी पोलिसांच्या कृतीवरही नाराजी व्यक्त केली.

राहुल गांधींनी निवडणूक आयोगाच्या कामकाजावर १० गंभीर आरोप केले आहेत, ज्यामुळे देशभरात खळबळ उडाली आहे.

राहुल गांधींच्या 'मत चोरी'च्या दाव्यांना पाठिंबा देण्यासाठी त्यांनी बेंगळुरूतील एक केस स्टडी समोर आणली आहे. बेंगळुरू सेंट्रलमधील मुनी रेड्डी गार्डनमधील १०-१५ चौरस फूट असलेल्या एकाच पत्त्यावर ८० मतदार नोंदवलेले आढळले. घराच्या सध्याच्या रहिवाशांनी त्या लोकांना ओळखण्यास नकार दिला. तसेच, घराच्या मालकाने कबूल केले की, अनेक जुने भाडेकरू आजही त्याच पत्त्यावर मतदान करतात. हा प्रकार मतचोरीचाच असल्याचे राहुल गांधींचे म्हणणे आहे.

राहुल गांधींच्या या आरोपांवर भाजपने जोरदार पलटवार केला आहे. मोर्चा काढण्याऐवजी राहुल गांधींनी निवडणूक आयोगात प्रतिज्ञापत्र सादर करावे आणि पुरावे द्यावे, अशी मागणी भाजपने केली आहे. भाजपने काँग्रेसवर निवडणुकांमध्ये पराभव होण्याची भीती असल्याने असे बिनबुडाचे आरोप करत असल्याचा आरोप केला आहे.