'आकाश काळवंडलं, सगळीकडे फक्त रक्त'…; 79 वर्षांनंतरही 'लिटल बॉय'च्या आठवणीने उडतो थरकाप

मुंबई : जगाच्या इतिहासामध्ये दोन महायुद्धं झाली. त्यातलं दुसरं महायुद्ध जास्त विध्वंसक मानलं जातं. कारण, या महायुद्धात अणुबॉम्बचा पहिल्यांदा वापर झाला होता. दुसऱ्या महायुद्धात अमेरिकेनं जपानच्या दोन शहरांवर अणुबॉम्ब टाकले. 6 ऑगस्ट 1945 रोजी पहिला अणुबॉम्ब हिरोशिमावर आणि 9 ऑगस्ट रोजी दुसरा बॉम्ब नागासाकीवर टाकण्यात आला. या हल्ल्याला 79 वर्षं होत आहेत. हल्ल्यातून बचावलेल्यांच्या मनात अजूनही त्या भीषण आठवणी ताज्या आहेत. अणुबॉम्ब हल्ल्यातून बचावलेल्या लोकांना जपानमध्ये 'हिबाकुशा' म्हणतात. चिको किरियाके नावाच्या महिलेने आपल्या आठवणी सांगितल्या आहेत. त्या वेळी ती 15 वर्षांची होती. हल्ल्यानंतर तिला एक महिला पळताना दिसली होती. त्या महिलेच्या शरीरातली आतडी बाहेर आली होती. शेकडो लोक मदतीसाठी ओरडत होते.