आनंदाची बातमी! आता किडनी, लिव्हर, हार्ट ट्रान्सप्लांट होणार मोफत; सरकार उचलणार लाखोंचा खर्च

राज्य सरकारने योजनेत मोठा बदल करत अवयव प्रत्यारोपणाचा समावेश करण्याचा निर्णय घेतला आहे. प्रत्यारोपणासाठी रुग्णालयांना पाच लाख रुपयांचे पॅकेज दिले जाणार आहे. याव्यतिरिक्त लागणारा जादा खर्चही विशेष निधीतून भरता येणार आहे. अवयव प्रत्यारोपणासारख्या महागड्या शस्त्रक्रियेसाठी महात्मा फुले जनआरोग्य योजना आणि आरोग्य विभागाच्या अन्य योजनांची सांगड घालून संपूर्ण उपचार मोफत करण्यासाठी धोरण तयार करण्याबाबत प्रशासनाच्या हालचाली सुरू आहेत. याबाबत जलद गतीने कार्यवाही करण्यात येत आहे.

एका रुग्णालयात हृदय प्रत्यारोपणाचा खर्च 25 ते 40 लाखांच्या घरात सांगितला जातो. त्यामुळे प्रत्यारोपण हा एक 'बाजार' बनला असल्याचा आरोप अनेक नातेवाईकांकडून केला जात होता. आता महात्मा फुले योजनेमुळे हा खर्च वाचणार असल्याने रुग्णांना मोठा दिलासा मिळणार आहे, अशी प्रतिक्रिया डॉक्टरांकडून व्यक्त होत आहे.