12 ज्योतिर्लिंगांपैकी महाराष्ट्रातील 'हे' प्रसिद्ध तीर्थक्षेत्र 3 महिने बंद, 1 जानेवारी 2026 पासून भक्तांना बंदी

बारा ज्योतिर्लिंगांपैकी एक आणि महाराष्ट्राचे वैभव असलेल्या श्री क्षेत्र भीमाशंकर मंदिर भाविकांच्या दर्शनासाठी पुढील काही महिने बंद राहणार आहे. नवीन वर्षाच्या सुरुवातीलाच दर्शनासाठी येणाऱ्या भाविकांची मोठी निराशा होणार आहे.

भीमाशंकर हे शिवशंकराच्या बारा ज्योतिर्लिंगांपैकी सहावे ज्योतिर्लिंग मानले जाते. सह्याद्रीच्या पर्वतरांगांमध्ये वसलेले हे मंदिर अध्यात्म आणि निसर्गसौंदर्याचा अद्भुत संगम आहे.

भीमाशंकरला येणाऱ्या भाविकांची संख्या आणि काही महत्त्वाच्या वारांना इथं होणारी गर्दी लक्षात घेता मंदिर परिसरात भाविक आणि पर्यटकांना येण्यास बंदी घालण्यात येणार आहे.

नव्या वर्षात या तीर्थक्षेत्रावर दर्शनासाठी येणाऱ्या अनेक भाविकांना अनपेक्षित अशा निर्णयाला सामोरं जावं लागणार आहे. हा निर्णय म्हणजे भीमाशंकर मंदिर बंद ठेवण्याबातचा.

अनेकांसाठीच पूजनीय असणाऱ्या आणि अनेकांची श्रद्धा असणाऱ्या बारा ज्योतिर्लिंगांपैकी एक असं पुणे जिल्ह्यातील श्री क्षेत्र भीमाशंकर मंदिर भाविकांच्या दर्शनासाठी पुढील तीन महिने बंद राहणार आहे.

1 जानेवारी 2026 पासुन पुढील तीन महिने भीमाशंकर मंदिर बंद ठेवण्याच्या या निर्णयाची अंमलबजावणी करण्यात येणार आहे. ज्यामुळं नव्या वर्षाची सुरुवात देवदर्शनानं, त्यातही भीमाशंकराच्या दर्शनानं करु पाहणाऱ्यांची निराशा होणार आहे.

कुंभमेळ्याच्या पार्श्वभूमीवर भीमाशंकरला विकास आराखड्यातुन नव्याने विकास कामे सुरू करण्यात येत आहेत. भीमाशंकर विकास आराखड्यात मुख्य मंदिराच्या सभा मंडपाचं काम नव्यानं पार पडणार आहे. मंदिराचं काम सुरू असताना कोणत्याही प्रकारची दुर्घटना घडू नये यासाठी मुख्य मंदिर दर्शानासाठी तीन महिने बंद ठेवण्याचा निर्णय व्यवस्थापनानं घेतला आहे.