महिलांनो सावधान! फॅशनसाठी हातात घालत असाल मंगळसूत्र तर होईल नुकसान, वैवाहिक जीवनावर होतो परिणाम

आधुनिक काळानुसार दागिन्यांच्या फॅशनमध्येही मोठे बदल होत आहेत. पूर्वी गळ्यात घातले जाणारे 'मंगळसूत्र' आता अनेक महिला 'ब्रेसलेट' म्हणून हातात घालताना दिसतात. मात्र, पारंपारिक आणि धार्मिक दृष्टिकोनातून हे कितपत योग्य आहे?

मंगळसूत्र हातात घातल्याने त्याचे महत्त्व कमी होते का? यावर ज्योतिषशास्त्र आणि विज्ञानाचे काय मत आहे, हे जाणून घेणे रंजक ठरेल. मंगळसूत्र हा केवळ एक दागिना नसून ते विवाहित स्त्रीच्या भाग्याचे आणि पतीच्या दीर्घायुष्याचे प्रतीक मानले जाते.

धार्मिक आणि पारंपारिक महत्त्व: हिंदू संस्कृतीनुसार, मंगळसूत्र हे गळ्यात परिधान करण्याचे 'सौभाग्य लेणं' आहे. लग्नाच्या वेळी पती ते पत्नीच्या गळ्यात बांधतो, जे हृदयाशी जोडलेले असते. हातात मंगळसूत्र घालणे ही हिंदू परंपरा नाही. शास्त्रांनुसार, ते गळ्यात असणेच अधिक शुभ मानले जाते कारण ते थेट पती-पत्नीमधील आत्मिक बंध दर्शवते.

वैज्ञानिक कारण: मंगळसूत्र गळ्यात घालण्यामागे वैज्ञानिक कारणही आहे. मंगळसूत्रातील सोन्याच्या वाट्या महिलेच्या हृदयाजवळ असतात. सोन्याचा स्पर्श आणि त्यातून निर्माण होणारी ऊर्जा हृदयाच्या आरोग्यासाठी आणि रक्तदाब नियंत्रित ठेवण्यासाठी फायदेशीर मानली जाते. हातात घातल्यास हा वैज्ञानिक लाभ मिळत नाही.

नकारात्मक ऊर्जेपासून रक्षण: मंगळसूत्रातील काळे मणी वाईट नजरेपासून रक्षण करतात. गळ्यात मंगळसूत्र असताना ते एका संरक्षण कवचाप्रमाणे काम करते. हातात ब्रेसलेट म्हणून घातल्यास ते अनेकदा कामाच्या वेळी कशावरही घासले जाऊ शकते किंवा त्याला घाण लागू शकते, ज्यामुळे त्याची पवित्रता कमी होते असे मानले जाते.

ज्योतिषशास्त्रीय परिणाम: मंगळसूत्रातील सोने हे 'गुरू' ग्रहाचे प्रतीक आहे. गुरू हा वैवाहिक सुखाचा कारक आहे. हातात मंगळसूत्र घातल्याने जर ते वारंवार जमिनीला स्पर्श करत असेल किंवा अस्वच्छ होत असेल, तर त्याचा गुरू ग्रहावर नकारात्मक परिणाम होऊन वैवाहिक जीवनात तणाव निर्माण होऊ शकतो, असा काही तज्ज्ञांचा दावा आहे.

आधुनिक कल आणि वैयक्तिक आवड: आजच्या 'वर्किंग वुमन'साठी गळ्यात मोठे मंगळसूत्र घालणे अनेकदा गैरसोयीचे ठरते. त्यामुळे हातात मंगळसूत्र घालण्याचा ट्रेंड वाढला आहे. धार्मिक दृष्टिकोनातून ते गळ्यात घालणे श्रेष्ठ असले तरी, बदलत्या काळानुसार ही एक वैयक्तिक पसंती ठरत आहे. मात्र, त्याची शुद्धता आणि आदर राखणे महत्त्वाचे आहे.