भाजपला घाम फोडलेल्या प्रणिता भालके एकनाथ शिंदेंच्या सेनेत प्रवेश करणार!

पंढरपूर नगर परिषद निवडणुकीत भारतीय जनता पक्षाला जोरदार धक्का बसला. पंढरपूर नगर परिषदेच्या तीर्थक्षेत्र विकास आघाडीच्या नगराध्यक्षपदाच्या उमेदवार प्रणिता भालके या विजयी झाल्या. भारतीय जनता पक्षाच्या उमेदवाराविरोधात त्यांनी दोन हात करून प्रतिस्पर्ध्यांना धूळ चारली. पंढरपूरमध्ये भाजपला घाम फोडणाऱ्या प्रणिता भालके शिंदेसेनेत प्रवेश करणार असल्याचे सूत्रांनी सांगितले.

भगीरथ भालके हे लवकरच एकनाथ शिंदे यांच्या भेटीलाही जाणार आहे. भगीरथ भालके यांच्या पत्नी प्रणिता भालके या नुकत्याच पंढरपूरच्या नगराध्यक्ष झाल्या. भालके नगराध्यक्ष झाल्यावर एकनाथ शिंदे यांनी पंढरपूरचे नगराध्यक्ष आपला असल्याचे जाहीर केले. त्यामुळे भालके लवकरच एकनाथ शिंदे यांच्या शिवसेनेत प्रवेश करतील, अशी शक्यता निर्माण झाली आहे.

पंढरपूर नगरपरिषद निवडणुकीत भगीरथ भालके आणि यांच्या समर्थकांनी भाजपला धक्का देत तब्बल १४ वर्षांनंतर सत्तांतर घडवून आणले. दिवंगत नेते भारत भालके यांच्या स्नुषा प्रणिता भालके यांनी ११ हजारांच्या फरकाने विजय मिळवला. या निकालामुळे भाजपचे आमदार समाधान आवताडे आणि माजी आमदार प्रशांत परिचारक यांना मोठा झटका बसला.

भालके कुटुंब आधी काँग्रेस पक्षात होते. भारत भालके हे काँग्रेस पक्षाकडून आमदारही राहिले. त्यांच्या निधनानंतर भगिरथ भालके यांनी राष्ट्रवादी काँग्रेसकडून विधानसभा निवडणूक लढवली. परंतु त्यांचा पराभव झाला. त्यानंतर आता स्थानिक आघाडी करून प्रणिता भालके नगर परिषद निवडणुकीला सामोरे गेल्या. भालके यांच्या विजयानंतर पंढरपूरमध्ये आपलाच नगराध्यक्ष विजयी झाल्याचे एकनाथ शिंदे म्हणाले. त्याचवेळी त्यांनी भालके यांच्या शिवसेना पक्षप्रवेशाचे संकेत दिले.