Guess Who : 'बाप' सुपरस्टार, पण 'लेक' फ्लॉप! पाहत होता CM ला डेट करण्याची स्वप्न, मग करिश्मा कपूरसोबत मोडलं लग्न

बॉलिवूडची दुनिया खरंच खूप वेगळी आहे. इथे तुम्ही कोणत्या भूमिकेतून लोकांच्या मनात घर कराल, हे सांगता येत नाही. कधीकधी नायक म्हणून आलेला कलाकार नंतर खलनायकाच्या भूमिकेतून प्रकाशझोतात येतो, तर कधी साईड रोल करूनही स्टार बनतो. आज आपण एका अशाच अभिनेत्याबद्दल बोलणार आहोत, ज्याने सुपरस्टार वडिलांचा वारसा घेऊन मुख्य अभिनेता म्हणून करिअरची सुरुवात केली, पण त्याला खरी ओळख मिळाली ती खलनायक म्हणून. हा अभिनेता आता ५० वर्षांचा असून, आजही 'सिंगल' आहे.

या अभिनेत्याचे नाव आहे अक्षय खन्ना, जो सुपरस्टार विनोद खन्ना यांचा धाकटा मुलगा आहे. १९९७ मध्ये 'हिमालय पुत्र' या चित्रपटातून या अभिनेत्याने आपल्या करिअरची सुरुवात केली. त्याच्या वडिलांचा मोठा लौकिक असूनही, त्याचा पहिला चित्रपट बॉक्स ऑफिसवर आपटला. पण त्याच वर्षी आलेल्या 'बॉर्डर' या ब्लॉकबस्टर चित्रपटात त्याला कौतुक मिळाले. यानंतरही त्याने 'मोहब्बत', 'डोली सजा के रखना', 'आ अब लौट चलें' आणि 'लावारिस' यांसारख्या अनेक फ्लॉप चित्रपटांमध्ये काम केले. 'ताल' आणि 'दिल चाहता है' सारख्या हिट चित्रपटांतही तो दिसला, पण तरीही त्याला बॉलिवूडमध्ये म्हणावी तशी ओळख मिळाली नाही.

२००२ साली अक्षय खन्नाने 'हमराझ' या चित्रपटात मुख्य खलनायकाची भूमिका साकारली. अब्बास-मस्तान दिग्दर्शित या चित्रपटात त्याने प्रेक्षकांची मने जिंकली आणि आपल्या भूमिकेसाठी अनेक पुरस्कारही मिळवले. 'हमराझ'नंतर त्याने 'हंगामा' आणि 'हलचल' सारख्या कॉमेडी चित्रपटांमध्येही यश मिळवले. मात्र, २००८ मध्ये आलेल्या 'रेस' चित्रपटातील त्याच्या नकारात्मक भूमिकेने पुन्हा एकदा प्रेक्षकांची पसंती मिळवली. यानंतर त्याने 'ढिशूम', 'मॉम', 'इत्तेफाक' आणि नुकत्याच आलेल्या 'दृश्यम २' सारख्या चित्रपटांतून आपल्या अभिनयाने चाहत्यांचे मनोरंजन केले.

अक्षय खन्नाच्या खासगी आयुष्याबद्दल बोलायचे झाल्यास, १९९० च्या दशकाच्या उत्तरार्धात तो करिश्मा कपूरला डेट करत असल्याच्या चर्चा होत्या. करिश्माचे वडील रणधीर कपूर यांना अक्षय आणि करिश्माचे लग्न व्हावे असे वाटत होते, इतकेच नव्हे तर त्यांनी खन्नांच्या घरी लग्नाचा प्रस्तावही पाठवला होता. मात्र, करिश्माची आई बबिता कपूर या नात्याच्या विरोधात होत्या. करिश्माने आपल्या करिअरच्या ऐन भरात चित्रपट सोडू नये असे बबिताला वाटत होते. त्यामुळे हे नाते संपुष्टात आले.

आज ५० वर्षांचा असूनही अक्षय खन्ना अजूनही 'सिंगल' आहे. विशेष म्हणजे, त्याने एकदा तामिळनाडूच्या दिवंगत माजी मुख्यमंत्री जयललितांना डेट करण्याची इच्छा व्यक्त केली होती, त्यावेळी त्या त्याच्यापेक्षा २७ वर्षांनी मोठ्या होत्या! सध्या तो 'छावा' चित्रपटात सम्राट औरंगजेबच्या भूमिकेत दिसला आहे. खलनायक म्हणून अक्षयने आपले बॉलिवूडमध्ये स्थान मजबूत केले, हे खरंच कौतुकास्पद आहे.