Relationship Tips : Gen Z चा 'हार्डबॉलिंग डेटिंग ट्रेंड' लोकप्रिय का होतोय? यात ब्रेकअप होत नाही का? वाचा फायदे

आजची नवी जनरेशन म्हणजेच Gen Z, नात्यांच्या बाबतीत पूर्वीसारख्या गुंतागुंतीच्या गोष्टींवर विश्वास ठेवत नाही. त्यांच्यासाठी वेळ आणि भावना दोन्हींची किंमत आहे. त्यामुळे “पुढे पाहू काय होतं” अशा नात्यांमध्ये अडकायची त्यांची इच्छा नसते. याच विचारसरणीतून एक नवा डेटिंग ट्रेंड समोर आला आहे, ज्याला हार्डबॉलिंग असं म्हणतात. नाव ऐकून क्रिकेटशी संबंधित वाटेल, पण याचा क्रिकेटशी दूरदूरपर्यंत काहीही संबंध नाही. हा फक्त नात्यांमध्ये थेट आणि स्पष्टपणे बोलण्याचा एक मार्ग आहे.

हार्डबॉलिंग याचा अर्थ खूप सोपा आहे. नातं सुरू करण्याआधीच सगळं स्पष्ट करून टाकणं. उदाहरणार्थ, लग्न करायचं आहे की नाही? सीरियस रिलेशनशिप हवी आहे की फक्त कॅज्युअल डेटिंग? लाँग डिस्टन्स चालेल का नाही? पूर्वी लोक हे प्रश्न महिने-महिने टाळायचे आणि नंतर वाद निर्माण व्हायचे. पण Gen Z आता सुरुवातीलाच स्पष्ट करतात, “मला हेच हवं आहे, जुळत नसेल तर काही हरकत नाही.”

हा ट्रेंड लोकप्रिय होण्याचं आणखी एक कारण म्हणजे आजकाल ब्रेकअप आणि रिलेशनशिपमधील ताणतणाव खूप सामान्य झाला आहे. नकळत अपेक्षा तयार होतात आणि समोरची व्यक्ती तशी नसेल तर मन दुखावतं. हार्डबॉलिंगमुळे ही संपूर्ण मानसिक कोंडी बऱ्याच प्रमाणात कमी होते. सुरुवातीलाच सगळं स्पष्ट झालं की “त्याने/तिने असं का केलं?” किंवा “तसं का केलं नाही?” अशा प्रश्नांची चिंता कमी होते.

हार्डबॉलिंगमध्ये डेटवर बसताच लोक मोकळेपणाने आपली भूमिका मांडतात. कुणी सांगतो की तो/ती फक्त लग्नाच्या उद्देशाने डेट करतो/करते, तर कुणी स्पष्ट सांगतो की त्यांना फक्त कॅज्युअल रिलेशनशिप हवी आहे. त्यामुळे समोरच्यालाही लगेच कळतं की पुढे जायचं आहे की नाही. म्हणजेच विनाकारण वेळ वाया जात नाही आणि खोट्या अपेक्षाही निर्माण होत नाहीत.

सोशल मीडिया आणि डेटिंग अ‍ॅप्समुळे या ट्रेंडला आणखी चालना मिळाली आहे. आता अनेकजण आपल्या प्रोफाइलमध्येच लिहितात “नो टाइमपास”, “सीरियस रिलेशन ओन्ली”, “मॅरेज माइंडसेट” किंवा “नो लाँग डिस्टन्स”. पूर्वी अशा गोष्टी उद्धट वाटायच्या, पण आता त्याकडे मॅच्युरिटी आणि सेल्फ-रिस्पेक्ट म्हणून पाहिलं जातं. गोलमोल बोलण्यापेक्षा थेट सांगणं सगळ्यांनाच सोपं वाटू लागलं आहे.

हार्डबॉलिंगचे फायदेही कमी नाहीत. सर्वात मोठा फायदा म्हणजे स्पष्टता. दोघांनाही नातं कुठल्या दिशेने चाललं आहे हे माहीत असतं. दुसरा फायदा म्हणजे वेळेची बचत. विचार जुळत नसतील तर तिथेच गोष्ट संपते. तिसरा फायदा म्हणजे मानसिक शांती. कमी गोंधळ, कमी ताण आणि ब्रेकअपची भीतीही कमी. त्यामुळेच याला ब्रेकअप अ‍ॅंग्जायटीपासून वाचण्याचा स्मार्ट मार्ग मानलं जात आहे.

हो, काही लोकांचं म्हणणं आहे की हा प्रकार खूपच प्रॅक्टिकल आहे आणि त्यामुळे रोमँटिक भावना कमी होतात. पण Gen Z यावर सरळ उत्तर देतात की, सगळं आधी स्पष्ट असेल तरच रोमँस खऱ्या अर्थाने एन्जॉय करता येतो. नाहीतर खोट्या अपेक्षाच मनाला जास्त त्रास देतात. याच विचारसरणीसह हार्डबॉलिंग डेटिंग ट्रेंड दिवसेंदिवस लोकप्रिय होत चालला आहे आणि येत्या काळात तो नातेसंबंधांची “नवी नॉर्मल स्टाइल” बनेल, असंच दिसतंय.