BBM6: करण सोनावणेने लावली काडी, पहिल्याच दिवशी घरात महाभारत! तन्वी आणि रुचितामध्ये जुंपली, नेमकं काय घडलं?

सोशल मीडियावर व्हायरल झालेल्या प्रोमोमध्ये दिसतंय की, करण सोनवणे आणि रुचिता जामकर गार्डन एरियात बसून गप्पा मारत आहेत. यावेळी ते दोघे घरातील स्विमिंग पूल विषयी बोलताना दिसत आहेत. करण आपल्या मिश्किल शैलीत म्हणतो, "स्विमिंगमध्ये गेल्यावर आपण थोडंफार पाणी पितोच ना... उगाच फालतूमध्ये..." असं म्हणत तो बुडण्याचा अभिनय करून दाखवतो. रुचिता त्याच्या या जोकवर हसते.

मात्र, तिथे जवळच उभी असलेल्या तन्वी कोल्तेला हे 'फालतू' शब्द जिव्हारी लागतो. ती त्याला मध्येच टोकते आणि म्हणते, "तू फालतूमध्ये असं म्हणू नकोस." इथूनच वादाची ठिणगी पडली. रुचिताला तन्वीचं असं मध्येच बोलणं अजिबात आवडत नाही. ती तडक उत्तर देते, "ही नेहमी टपलेलीच असते, कोण काय बोलतंय याकडे हिचं लक्ष असतं आणि ही शस्त्र घेऊनच तयार असते." यावर तन्वीचा पारा चढतो आणि ती ओरडून सांगते, "तू लिमिट क्रॉस करू नकोस!"

यावर मात्र रुचिताचा राग अनावर होतो. ती तन्वीला थेट बिनडोक म्हणते आणि रागाच्या भरात "तुझं तोंड शेणात घाल" असं अतिशय टोकाचं विधान करते. पहिल्याच दिवशी अशा प्रकारची भाषा वापरली गेल्यामुळे घराघरातील प्रेक्षकही थक्क झाले आहेत.

नुसती भांडणंच नाहीत, तर पहिल्याच दिवशी स्पर्धकांनी बिग बॉसच्या नियमांची पायमल्ली केल्याचं दिसतंय. घरात प्रवेश करतानाच 'शॉर्टकट' की 'कष्टाचा मार्ग' असे दोन पर्याय देण्यात आले होते. यावरूनही स्पर्धकांमध्ये गटबाजी सुरू झाली आहे. प्रीमिअरनंतर दाखवण्यात आलेल्या प्रोमोनुसार, स्पर्धकांनी केलेल्या एका मोठ्या चुकीमुळे बिग बॉसने पहिल्याच दिवशी संपूर्ण घराला कठोर शिक्षा सुनावली आहे. यामुळे आता सदस्यांची झोप उडणार हे नक्की.