मोबाईलचं व्यसन कसं सोडायचं? जबरदस्त उपाय, मग अजिबात कामाशिवाय वापरणार नाही!

आजकाल लहान मुलांपासून वृद्ध व्यक्तींपर्यंत जर कोणी बराच वेळ मोबाईलचा वापर करत असतील, तर त्यांचा सर्वाधिक वेळ हा रिल्स किंवा शॉर्ट्स बघण्यात जातो. या व्हिडिओ बघायला फार मजेदार किंवा आकर्षक असल्या तरी त्यांचे दुष्परिणाम कळत-नकळतपणे मनावर आणि शरीरावर होत असतात.

आपण जर सतत रील्स बघत बसलो, तर आपल्या मनात अस्वस्थता वाढू लागते. खरंतर या व्हिडिओज् अशाच बनवलेल्या असतात की, त्या सतत बघाव्याशा वाटतात. त्यामुळे त्याचं आपल्याला व्यसन लागू शकतं.

एकदा व्यसन लागलं की, आपल्या हातातून मोबाईल काढल्यास आपली चिडचिड वाढू शकते, त्याचं रुपांतर कधी भांडणात होईल हे कळतही नाही. बऱ्याचदा आपण एकट्यात मोबाईल बघत बसतो, अशावेळी आपला लोकांशी संवाद कमी होतो. त्यातून उदासीनता येऊ शकते, डिप्रेशन वाढू शकतं.

वाढलेल्या स्क्रीन टाइमचा परिणाम दृष्टीवरही होऊ शकतो. तसंच शरीरयष्टीवरही हा दुष्परिणाम दिसून येतो. पाठदुखी, मानदुखीचा त्रास होतो. तसंच लठ्ठपणा येतो आणि लठ्ठपणामुळे होणारे आजार उद्भवतात. महत्त्वाचं म्हणजे रिल्स शॉर्ट असल्यामुळे आपली एकाग्रता कमी होते. त्यामुळे ज्या कामांमध्ये एकाग्रता लागते तिथे लक्ष केंद्रित करता येत नाही. त्याचा दुष्परिणाम अभ्यासावर होतो.

तज्ज्ञ सांगतात की, कोणत्याही व्यसनमुक्तीसाठी उपाय एकच असतो की, त्याच्यापासून दूर जाणं. त्यामुळे काही दिवसांसाठी रिल्स नाही बघायचे असं ठरवणं म्हणजेच स्वत:ला डिजिटल डिटॉक्स करणं, सोशल मीडियाच्या वापरासाठी ठराविक वेळ ठेवणं, इत्यादी केल्यास मोबाईचं व्यसन सुटू शकतं. तसंच मन शांत राहण्यासाठी मेडिटेशन करावं, असा सल्ला तज्ज्ञ देतात.