हिवाळ्यात त्वचा कोरडी पडतेय? लिंबू, गुलाबजल वापरावं का? डॉक्टरांचा सल्ला

हिवाळ्याची चाहूल लागताच त्वचा कोरडी होण्यास सुरवात होते. त्याची योग्य काळजी घेतली नाही तर कोरडेपणा वाढतो आणि त्वचेला खाज सुटते. त्यातून नवनवीन त्वचेचे आजार निर्माण होतात. त्यामुळे हिवाळ्यात त्वचेची काळजी घेणे आवश्यक आहे.

काहीवेळा आपण घरगुती उपाय करतो आणि त्यातून समस्या आणखी वाढतात. त्यामुळे डॉक्टरांच्या सल्ल्याने हिवाळ्यात त्वचेची काळजी घेणे आवश्यक आहे. याबाबत अमरावती येथील त्वचारोग तज्ज्ञ डॉ. अनुराधा टाकरखेडे यांनी लोकल18 सोबत बोलताना महत्त्वाची माहिती दिलीये.

डॉ टाकरखेडे सांगतात की, “हिवाळ्यात त्वचा कोरडी होते आणि त्याला खाज सुटते. त्यामुळे त्वचेला मॉइश्चराईज ठेवणे अत्यंत गरजेचे आहे. हिवाळ्यात त्वचेची काळजी घेताना आपली त्वचा नेमकी कोणत्या प्रकारात मोडते? हे जाणून घेणे महत्वाचे आहे. तुमची त्वचा जर तेलकट असेल तर त्यावर वॉटर बेस म्हणजेच एलोवेरासारखे मॉइश्चरायजर लावावे.”

कोरडी त्वचा असेल तर त्यासाठी ऑईल बेस मॉइश्चरायजर वापरावे. त्यानंतर तुमची त्वचा जर नॉर्मल असेल तर त्यावर दोन्ही प्रकारच्या मॉइश्चरायजरचा वापर करावा. त्यानंतर पूर्ण शरीरासाठी तुम्ही खोबरेल तेल वापरू शकता.

आंघोळीनंतर थोड्या ओलसर अंगाला खोबरेल तेल लावल्यास ओलावा टिकून राहण्यास मदत होते. त्यासोबतच तुम्ही डॉक्टरांच्या सल्ल्याने एखादे मॉश्चरायझर वापरू शकता.

त्वचेचा प्रकार ओळखून मॉइश्चरायजर न वापरल्यास चेहऱ्यावर पिंपल्स येतात, त्वचा काळी पडते. त्यामुळे सर्व बाबी लक्षात घेऊनच मॉइश्चरायजरचा वापर करावा, असा सल्ला डॉक्टर देतात.

घरगुती उपाय करतांना त्वचेला लिंबू, ग्लिसरीन, गुलाब जल लावू नये. यामुळे त्वचेला इजा पोहचते. ग्लिसरीन लावल्याने त्वचा काळी पडते. लिंबामुळे त्वचेला खाज सुटते. काही वेळा हलक्या प्रॉडक्टचा वापर केल्याने त्वचा लालसर होते. त्यामुळे घरगुती उपाय करतांना काळजी घेणे आवश्यक आहे. कोणतीही गोष्ट करतांना डॉक्टरांचा सल्ला घेणे महत्वाचे आहे. (प्रगती बहुरुपी, प्रतिनिधी)