Summer Health: उन्हाळ्यात AC चा वापर ठरू शकतो घातक, हे 8 गंभीर परिणाम माहितीये का?

सध्या उन्हाचा कडाका चांगलाच वाढला आहे. प्रत्येकाला एअर कंडिशनर अर्थात एसीच्या (AC), कुलरच्या थंडगार हवेचे सुख हवेहवेसे वाटू लागते. बहुतांश कार्यालयात आणि अनेक घरांत देखील एसी लावलेले असतात. एसीच्या थंड हवेत बसून काम करताना छान वाटतं, पण हे सुख आरोग्याच्या दृष्टीनं मात्र त्रासदायक ठरू शकतं.

प्रतिकार शक्ती : उष्णता सहन करण्यासाठी आणि बाहेर टाकण्यासाठी आपलं शरीर घाम निर्माण करतं. श्वासोच्छवासाद्वारे किंवा घामाच्या माध्यमातून उष्णतेपासून सुटका मिळते. एसीमुळे या दोन्ही क्षमता कमी करतो. त्यामुळं जेव्हा आपण एसीच्या बाहेर जातो तेव्हा आपल्याला जास्त गरम वाटू लागतं आणि आजारी पडण्याचा देखील धोका वाढतो.

डोळ्यांचा त्रास : कॉन्टॅक्ट लेन्सेस वापरणाऱ्या लोकांना एसीमुळे त्रास होऊ शकतो. लेन्स वापरत असताना डोळ्यात ओलसरपणा असणं आवश्यक असते. पण एअर कंडिशनरमुळे डोळे कोरडे होतात. त्यामुळं त्याचा परिणाम लेन्सवर होतो आणि त्या लवकर खराब होतात. यातून देखील डोळ्यांना संसर्ग होण्याचा धोका असतो.

कोरडी त्वचा : आपल्या त्वचेवरही एसीच्या हवेचे दुष्परिणाम दिसून येतात. यामुळे त्वचेतील नैसर्गिक ओलावा नष्ट होतो. आपली त्वचा कोरडी पडते. विशेषत: चेहऱ्याची त्वचा ताणली जाते. त्यामुळं दीर्घकाळ एसीत राहणाऱ्यांनी मॉइश्चरायझरचा वापर करणं आवश्यक असतं.

डोकेदुखी : घरातील किंवा कार्यालयातील एसीचे तापमान खूपच कमी असेल तर डोकेदुखी आणि चिडचिडेपणा जाणवू शकतो. काही वेळा आपल्या मेंदूच्या शिरा तापमानातील बदल पेलू शकत नाहीत. त्यामुळे सतत एसीत राहणं डोकेदुखीचं कारण ठरू शकतं.

श्वसनावर परिणाम : तापमान आणि आर्द्रतेत अचानक बदल झाल्यामुळे आपल्या श्वसन व्यवस्थेवर परिणाम होतो. एसीच्या हवेतून होणाऱ्या संसर्गामुळे दम्यासारखे आजार देखील वाढू शकतात. राइनाइटिस आणि फेरींगिटिस हे घशाचा दाह आणि जखमांशी संबंधित आजारही होऊ शकतात. तसेच धुळीची अॅलर्जीही होऊ शकते.

सर्दी : सतत एसीत राहत असाल तर सामान्य तापमानात किंवा गरम ठिकाणी गेलात तर ताप येऊ शकतो. हा ताप जास्त दिवस राहाण्याची शक्यता असते. एसीचे तापमान खूप कमी होते तेव्हा डोकेदुखी आणि चिडचिडेपणा जाणवू शकतो. सर्दी, ताप यापासून सुरुवात होऊन ताप मेंदूत जाऊ शकतो.

हाडे : सतत एसीच्या कमी तापमानात बसल्यानं गुडघेच नाही तर शरीरातील सगळे सांधे दुखू लागतात. सांध्यांची कार्यक्षमताही कमी होते. यासाठी खुर्चीवर बसल्या बसल्या व्यायाम करणं आवश्यक आहे. तरच या त्रासापासून वाचता येईल.

लठ्ठपणा : थंड हवेच्या ठिकाणी आपल्या शरीराची ऊर्जा खर्च होत नाही, त्यामुळे शरीरावर चरबी वाढते. सतत एसीमध्ये राहिल्यानं थकवा जाणवतो. थकलेलं शरीर व्यायाम करू शकत नाही आणि शरीरातील कॅलरी खर्च होत नाहीत. त्यामुळे शरीरावर चरबीचे थर आणि लठ्ठपणा वाढत जातो.