वर्गात CCTV तरी कॉपी करण्याची हिम्मत, शिक्षण विभागाचा कठोर निर्णय, पर्यवेक्षक आणि केंद्र संचालकांना दणका

सुरेश जाधव, प्रतिनिधी, बीड: बीडच्या आष्टी तालुक्यातील जळगाव येथे असलेल्या जय भवानी विद्यालयाच्या इयत्ता दहावी परीक्षा केंद्रावर धक्कादायक प्रकार समोर आला आहे.

दहावीच्या गणिताच्या पेपरला हॉल क्रमांक दोनमध्ये विद्यार्थ्यांकडे कॉपी असल्याचे प्रशासनाच्या निदर्शनास आले होते. त्यानुसार आता या सर्व विद्यार्थ्यांचे पेपर कॉपी केस म्हणून स्वतंत्ररित्या विभागीय मंडळास पाठवण्यात आले आहेत.

तर दुसरीकडे या हॉलमध्ये कार्यरत पर्यवेक्षक नालकोल व केंद्र संचालक शेळके यांच्यावर देखील कारवाई करण्याबाबत आदेश देण्यात आले आहेत.

बीड जिल्ह्यात कॉपीमुक्ती अभियानासाठी प्रत्येक केंद्र आणि प्रत्येक वर्गावर झूम ॲपद्वारे प्रशासनाकडून लक्ष ठेवले जात आहे. या दरम्यानच हा प्रकार उघडकीस आला होता. त्यानंतर कारवाई करण्यात आली.

दहावी आणि बारावीच्या परीक्षेदरम्यान अनेक परीक्षा केंद्रावर सर्रास कॉपी केल्याचे समोर आले आहे. शिक्षण विभागाने कडक पावले उचलून संबंधितांवर गुन्हे दाखल केले आहेत.