Weather Alert: नोव्हेंबरअखेर वारं फिरलं, मराठवाड्यात तापमान घसरलं, या जिल्ह्यात वेगळीच स्थिती

गेल्या काही दिवसांमध्ये राज्यातील थंडीचे प्रमाण कमी झाले होते. आता मात्र वातावरणात बदल जाणवत असून तापमानात घट होऊन गारठा वाढला आहे. मराठवाड्यात देखील थंडीचा जोर वाढला असून पुन्हा शेकोट्या पेटल्या आहेत. रविवारी मराठवाड्याचा पारा आणखी घसरण्याची शक्यता हवामान विभागाने वर्तवली आहे. छत्रपती संभाजीनगरसह 8 जिल्ह्यांतील रविवारचा हवामान अंदाज जाणून घेऊ.

छत्रपती संभाजीनगर, जालना आणि परभणी या जिल्ह्यात आकाश निरभ्र राहील तसेच वातावरणात कोरडेपणा असणार आहे. आज छत्रपती संभाजीनगरमध्ये कमाल तापमान 28.6 अंश सेल्सिअस तर किमान तापमान 13.6 अंश सेल्सिअस पर्यंत घसरण्याची शक्यता आहे. आकाश निरभ्र राहील. तसेच जालना जिल्ह्यात दिवसभर अंशतः ढगाळ वातावरण राहणार आहे. तसेच कमाल तापमानात दोन अंशाची घट होऊ शकते. परभणीमध्ये देखील गारठा वाढणार आहे.

आज 30 नोव्हेंबर रोजी बीड जिल्ह्यात कमाल तापमान 29.0 अंश सेल्सिअस तर किमान तापमान 17.1 अंश सेल्सिअस इतके राहील व सकाळ व संध्याकाळच्या वेळेला थंडी वाढण्याची शक्यता आहे. तसेच हिंगोली आणि नांदेड या जिल्ह्यांत सामान्यतः आकाश निरभ्र असणार आहे. तसेच थंडीचा कडाका वाढण्याची शक्यता आहे. 

मराठवाड्यातील इतर सात जिल्ह्यांच्या तुलनेत लातूर जिल्ह्यात गारठा कमी असणार आहे. त्यामुळे रविवारी लातूरमध्ये दिवसा तापमान अंदाजे 32.0 अंश, तर रात्री 23.0 अंश सेल्सिअसपर्यंत राहण्याची शक्यता आहे. धाराशिव जिल्ह्यात तापमानात घट होण्याची शक्यता आहे. तसेच आकाश निरभ्र राहील.

मराठवाड्यामध्ये नोव्हेंबर अखेर थंडीचा कडाका वाढला आहे. तसेच वातावरण कोरडे आणि आकाश निरभ्र राहणार आहे. छत्रपती संभाजीनगरसह आठ जिल्ह्यांपैकी कोणत्याही जिल्ह्यासाठी सतर्कतेचा अलर्ट नाही. परंतु, हवामानात अचानक बदल होत असल्याने नागरिकांना आरोग्याची काळजी घ्यावी लागेल.