Weather Alert: 15 ऑगस्टला धो धो कोसळणार, मराठवाड्यातील 6 जिल्ह्यांना अलर्ट

राज्यातील हवामानात मोठे बदल जाणवत असून मराठवाड्यात जोरदार पाऊस सुरू आहे. आज 15 ऑगस्ट रोजी मराठवाड्यातील सहा जिल्ह्यांना यलो अलर्ट देण्यात आला आहे. छत्रपती संभाजीनगरसह 6 जिल्ह्यांत विजांच्या कडकडाटात जोरदार पावसाचा अंदाज आहे. त्यामुळे नागरिकांना योग्य ती काळजी घ्यावी लागेल.

15 ऑगस्ट रोजी छत्रपती संभाजीनगरसह जालना, बीड, परभणी, हिंगोली आणि नांदेड जिल्ह्यांत जोरदार पावसाची शक्यता आहे. या जिल्ह्यांत ताशी 30 ते 40 किमी वेगाने वारे वाहतील. तसेच विजांचा कडकडाट आणि ढगांच्या गडगडाटात मुसळधार पावसाचा इशारा देण्यात आला आहे.

धाराशिव आणि लातूर जिल्ह्यांमध्ये आज ढगाळ वातावरण राहण्याचा अंदाज असून काही भागांत हलका पाऊस पडू शकतो. मात्र या जिल्ह्यांसाठी हवामान विभागाने कोणताही सतर्कतेचा अलर्ट जारी केलेला नाही.

गुरुवारी मराठवाड्यातील आठही जिल्ह्यांना यलो अलर्ट देण्यात आला होता. गेल्या 24 तासात छत्रपती संभाजीनगरसह इतर जिल्ह्यांत जोरदार पाऊस झाला. आज पुन्हा पावसाचा इशारा असून पुढील 4 दिवस यलो अलर्ट कायम असणार आहे.

बंगालच्या उपसागरात निर्माण झालेल्या कमी दाबाच्या क्षेत्राचा परिणाम राज्यातील हवामानावर होत असून त्याचा प्रभाव पुढील काही दिवस कायम राहण्याची शक्यता आहे. त्यामुळे मराठवाड्यातील शेतकरी आणि नागरिकांना योग्य ती काळजी घ्यावी लागेल.