मराठवाड्यात थंडीचा कडाका, परभणी आणि छत्रपती संभाजीनगरमध्ये पारा घसरला, पाहा आज काय स्थिती?

गेल्या काही दिवसात राज्यातील गारठा चांगलाच वाढलाय. सरासरी किमान तापमान कमालीची घट झाली असून हाड गोठवणाऱ्या बोचऱ्या थंडीने नागरिक कुडकुडले आहेत. मराठवाड्यातमध्ये थंडीचा चांगलाच कडाका वाढला असून काही ठिकाणी तापमान 9 अंश सेल्सिअसपर्यंत घसरले आहे.

परभणी आणि छत्रपती संभाजीनगरमध्ये पारा घसरलेला पाहायला मिळत आहे. परभणीमध्ये आज किमान तापमान 9 अंश सेल्सिअस एवढे असेल. थंडीचा कडाका वाढल्याने मराठवाड्यात शेकोट्या पेटल्याचे दिसत आहे.

जालना, बीड, नांदेड आणि धाराशिवमध्ये किमान तापमान 10 अंश सेल्सिअस असेल. हिंगोली आणि लातूर या जिल्ह्यामध्ये किमान तापमान 12 अंश सेल्सिअस असेल. याठिकाणी आज हवामान कोरडे असेल.

छत्रपती संभाजीनगरमध्ये कमाल तापमान 30 अंश सेल्सिअस असेल आणि किमान तापमान 9 अंश सेल्सिअस राहील. शहरात सकाळचा वेळी धुके पडत आहे.

दरम्यान, थंडीचा जोर वाढल्याने नागरिकांना आरोग्याच्या समस्यांचा सामना करावा लागतोय. गरम कपडे खरेदी करण्यासाठी गर्दी होताना दिसतेय.