मोठी बातमी : निवडणूक कामकाजात गैरहजर राहणाऱ्या 17 अधिकारी-कर्मचाऱ्यांवर गुन्हा दाखल

छत्रपती संभाजीनगरमधून निवडणूक संदर्भात मोठी बातमी समोर येत आहे. निवडणुकीसाठी नियुक्ती केल्यानंतर कामावर हजर न झालेल्या 17 अधिकारी-कर्मचाऱ्यांवर गुन्हा दाखल करण्यात आला आहे.

छत्रपती संभाजीनगर महानगरपालिका सार्वत्रिक निवडणूक- 2025 च्या अनुषंगाने स्थिर सर्वेक्षण पथकामध्ये एकूण 132 कर्मचारी आणि अधिकाऱ्यांची नियुक्ती करण्यात आली होती.

यापैकी 17 कर्मचारी-अधिकारी वारंवार आदेश देऊनही आणि मोबाईलद्वारे संपर्क करूनही कामावर रुजू झाले नाहीत.

त्यांनी वैद्यकीय रजा किंवा इतर कामांची कारणे सांगून निवडणूक कर्तव्यावर हजर राहण्याचे टाळले, ज्यामुळे लोकप्रतिनिधित्व अधिनियमांतर्गत हा गुन्हा दाखल करण्यात आला आहे.

दुसरीकडे बृहन्मुंबई महानगरपालिका सार्वत्रिक निवडणूक २०२५ – २६ कामकाजात गंभीर स्वरूपाचे गैरवर्तणूक करणा-या व निवडणूक प्रक्रियेत बाधा पोहोचविणा-या कनिष्ठ लेखापरीक्षकाला निलंबित करण्याचे आदेश अतिरिक्त महानगरपालिका आयुक्त (शहर) डॉ. (श्रीमती) अश्विनी जोशी यांनी दिले आहेत. दीपक जोहरे असे निलंबित करण्यात आलेल्या कनिष्ठ लेखापरीक्षकाचे नाव आहे.