Success Story: सिल्लोडच्या शेतकऱ्याची कमाल! मुरबाड जमिनीत प्रयोग केला अन् शेतमाल थेट इराणला पोहोचला

अनिल विष्णुपंत साबळे, जि छत्रपती संभाजीनगर महाराष्ट्रातील शेतकऱ्याने योग्य मेहनत आणि नवीन तंत्रज्ञानाची जोड दिल्यास आंतरराष्ट्रीय बाजारपेठही जिंकता येते, हे सोयगाव तालुक्यातील सावळदबारा येथील तरुण शेतकरी दीपक बुढाळ यांनी सिद्ध करून दाखवले आहे. त्यांनी आपल्या मेहनतीच्या जोरावर गावातील उत्तम दर्जाची केळी थेट इराण देशापर्यंत पोहोचवण्यात यश मिळवले आहे.

सावळदबारा परिसरात सध्या अनेक शेतकरी पारंपरिक शेती करतात, पण दीपक बुढाळ यांनी नेहमीच शेतीत नवनवीन प्रयोग करण्यावर भर दिला. या वर्षी त्यांनी सुमारे ५,००० केळीच्या झाडांची लागवड केली होती. मात्र, यंदा बाजारपेठेत केळीचे दर कोसळले.

प्रतिक्विंटल ३८० रुपयांपर्यंत भाव घसरल्याने अनेक केळी उत्पादक शेतकरी मोठ्या आर्थिक अडचणीत सापडले होते. अशा कठीण परिस्थितीत बुढाळ यांनी घाबरून न जाता, आपल्या उत्पादनाच्या उच्च गुणवत्तेवर लक्ष केंद्रित केले.

दीपक बुढाळ यांनी घेतलेल्या उच्च दर्जाच्या केळी उत्पादनाला निर्यातदारांनी चांगलीच पसंती दिली. याच उत्तम दर्जाच्या केळीचा थेट इराणला निर्यात करण्याचा व्यवहार निश्चित झाला. आतापर्यंत त्यांची २६ टन केळी प्रतिक्विंटल ८०० रुपये या चांगल्या दराने थेट इराणच्या बाजारपेठेत पोहोचली आहे.

स्थानिक बाजारातील ३८० रुपये दराच्या तुलनेत हा दुप्पट नफा आहे. या यशाने सावळदबारा या छोट्याशा गावाचे नाव आंतरराष्ट्रीय स्तरावर झळकले आहे. या यशस्वी प्रयोगामागे केवळ दीपक बुढाळ यांची मेहनतच नाही, तर परिसरातील पाण्याची उपलब्धताही कारणीभूत ठरली.

सावळदबारा परिसरात काही वर्षांपूर्वी तयार झालेल्या साठवण तलावामुळे अनेक शेतकऱ्यांना बागायती शेतीचा लाभ घेणे शक्य झाले. या जलसुविधेमुळेच दीपक बुढाळ यांना मोठ्या प्रमाणात आणि निर्यातक्षम केळी लागवडीचा महत्त्वाकांक्षी प्रयोग करता आला आणि त्याचे फळ आज आंतरराष्ट्रीय यशामध्ये मिळाले आहे.

दीपक बुढाळ यांचे हे यश हे सिद्ध करते की, शेतीत जिद्द, नवीन प्रयोग करण्याची वृत्ती आणि निर्यातक्षम उत्पादन घेण्याचा ध्यास असेल, तर शेतकऱ्याला परिस्थितीवर मात करून मोठे यश मिळवता येते.