Weather Alert: पश्चिम महाराष्ट्रात धो धो सुरूच, शनिवारी पुन्हा अलर्ट, पुणे ते कोल्हापूर आजचं अपडेट

ऑक्टोबर हीटमध्ये तापणाऱ्या महाराष्ट्रात अवकाळी पावसाचे धुमशान सुरू झाले आहे. गेल्या काही दिवासंत राज्याच्या दक्षिणकडील जिल्ह्यांमध्ये जोरदार पावसाने हजेरी लावली. आज 25 ऑक्टोबर रोजी मेघगर्जना विजांसह वादळी पावसाची शक्यता असून हवामान विभागाने सतर्कतेचा इशारा दिला आहे. पश्चिम महाराष्ट्रातील हवामान अंदाज जाणून घेऊ.

पुणे जिल्ह्यात शुक्रवारी 30.7 अंश सेल्सिअस कमाल तापमानाची नोंद झाली. तसेच 18.3 मिलिमीटर पाऊस झाला. आज पुणे जिल्ह्यात विजांच्या कडकडाटासह वादळी पावसाची शक्यता आहे. यावेळी कमाल तापमानाचा पारा 30 अंशावर राहिला. पुणे जिल्ह्यासह घाटमाथा भागात जोरदार पावसाची शक्यता असल्याने हवामान विभागाने यलो अलर्ट दिला आहे.

मागील 24 तासात सातारा जिल्ह्यात 28.6 अंश सेल्सिअस कमाल तापमानाची तसेच 11 मिलिमीटर पावसाची नोंद झाली. आज संपूर्ण साताऱ्यासह घाटमाथ्यावर विजांसह पावसाचा इशारा देण्यात आला आहे. यावेळी कमाल तापमानाचा पारा 30 अंशावर राहील.

कोल्हापूर जिल्ह्यात शुक्रवारी हलका ते मध्यम पाऊस झाला. तसेच 27.9 अंश सेल्सिअस तापमानाची नोंद झाली. पुढील 24 तासात कोल्हापूरसह घाटमाथ्यावर पावसाची शक्यता आहे. मात्र, कोणताही सतर्कतेचा अलर्ट नाही. यावेळी कमाल तापमान 29 अंश सेल्सिअस इतके राहील.

शुक्रवारी सोलापूर जिल्ह्यातील काही भागात पावसाने जोरदार हजेरी लावली. जिल्ह्यात 15 मिलिमीटर पावसाची नोंद झाली. आज जिल्ह्यात ढगांच्या गडगडाटासह मध्यम पावसाची शक्यता वर्तवण्यात आली आहे. यावेळी पारा 35 अंशावर राहण्याचा अंदाज आहे.

सांगली जिल्ह्यात मागील 24 तासात 28.8 अंश सेल्सिअस तापमानाची आणि 1 मिलीमीटर पावसाची नोंद झाली. आज जिल्ह्यात विजांसह पावसाची शक्यता हवामान विभागाकडून वर्तवण्यात आला आहे. यावेळी पारा 29 अंशावर राहण्याचा अंदाज आहे.

आज संपूर्ण पश्चिम महाराष्ट्रात विजांसह गडगडाटी पावसाची शक्यता आहे. पुणे, सोलापूरसह चार जिल्ह्यांना यलो अलर्ट देण्यात आला आहे. पुणे आणि सोलापूर वगळता पश्चिम महाराष्ट्रातील इतर भागात रविवारपासून पावसाचा जोर ओसरण्याची शक्यता आहे.