बारामती, इंदापुरात कोण जिंकणार? आबांचा लेक विधानसभेत प्रवेश करणार? न्यूज १८ च्या पत्रकारांचा अंदाज

पवार विरुद्ध पवार तसेच काका विरुद्ध पुतण्या अशी लढत होत असल्याने बारामती विधानसभा मतदारसंघाकडे संपूर्ण राज्याचे सगळ्यांचं लक्ष लागलं आहे. अजित पवार सातव्यांदा बारामतीचे प्रतिनिधित्व करणार की युगेंद्र पवार विधानसभेत पाऊल ठेवणार, याची उत्सुकता सगळ्यांना लागून राहिली आहे. न्यूज १८ लोकमतच्या पत्रकारांच्या पोलमध्ये अजित पवार यांना बारामतीमधील परिस्थिती अनुकूल असल्याचे सांगण्यात आले आहे. युगेंद्र पवार यांच्यासाठी बारामतीमधील परिस्थिती प्रतिकूल असल्याचे सांगण्यात येत आहे.

इंदापूर विधानसभा : राष्ट्रवादी शरदचंद्र पवार पक्षाचे नेते, उमेदवार हर्षवर्धन पाटील विरुद्ध दत्ता भरणे विरुद्ध अपक्ष प्रवीण माने यांच्यात इंदापुरात काँटे की टक्कर होते आहे. न्यूज १८ लोकमतच्या पत्रकारांच्या पोलमध्ये इंदापुरात हर्षवर्धन पाटील यांना अनुकूल परिस्थिती असेल, असे सांगण्यात आले.

कवठे महंकाळ विधानसभा : राष्ट्रवादीचे दिवंगत नेते आर आर पाटील यांचे चिरंजीव रोहित पाटील विरुद्ध त्यांचे कट्टर प्रतिस्पर्धी संजय काका पाटील यांच्यात तगडी फाईट होत आहे. कवठे महंकाळ विधानसभेत रोहित पाटील यांच्यासाठी अनुकूल परिस्थिती असेल, असा अंदाज न्यूज १८ लोकमतच्या पत्रकारांच्या पोलमध्ये वर्तविण्यात आला आहे.

सांगोला विधानसभा : काय झाडी काय डोंगर अशा डायलॉगने लोकप्रिय झालेले आमदार शहाजी बापू पाटील यांच्या सांगोल्यात काय होणार याकडे सगळ्यांचे लक्ष लागलेले आहे. शहाजी बापू विरुद्ध ठाकरे सेनेचे दीपक आबा साळुंखे विरुद्ध अपक्ष बाबासाहेब देशमुख यांच्यातील लढतीत १८ लोकमतच्या पत्रकारांच्या पोलमध्ये ठाकरे सेनेचे दीपक आबा साळुंखे यांच्यासाठी अनुकूल परिस्थिती असेल, असे सांगण्यात येत आहे.

कोरेगाव विधानसभा : शरद पवार यांचे खंदे शिलेदार शशिकांत शिंदे विरुद्ध शिंदेसेनेचे महेश शिंदे यांच्यातील अटीतटीच्या लढाईत शशिकांत शिंदे बाजी मारतील, असा अंदाज १८ लोकमतच्या पत्रकारांच्या पोलमध्ये वर्तविण्यात आला आहे.

पाटण विधानसभा : मावळत्या शिंदे सरकारमधील मंत्री शंभूराज देसाई यांच्या पाटणकडेही सातारा जिल्ह्यासह राज्याचे लक्ष लागलेले आहे. शंभूराज देसाई विरुद्ध सत्यजीत पाटणकर-हर्षल कदम अशा लढतीत शंभूराज देसाई यांना अनुकूल परिस्थिती असेल, असा अंदाज न्यूज १८ लोकमतच्या पत्रकारांच्या पोलमध्ये वर्तविण्यात आला आहे.

माण खटाव विधानसभा : देवेंद्र फडणवीस यांचे खंदे शिलेदार जयकुमार गोरे विरुद्ध राष्ट्रवादी पवार गटाचे प्रभाकर घार्गे यांच्यातील लढतीत जयकुमार गोरे यांचा विजय नक्की असेल, असा अंदाज न्यूज १८ लोकमतच्या पत्रकारांच्या पोलमध्ये वर्तविण्यात आला आहे.