Rain Alert: नागपूरसाठी धोक्याचा इशारा, विदर्भात बरसणार धो-धो! 11 जिल्ह्यांना अलर्ट, आजचा हवामान अंदाज

विदर्भात मे महिन्याच्या सुरुवातीपासूनच पावसाचे वातावरण आहे. गेल्या काही दिवसांपासून विजांच्या कडकडाटासह वादळी पावसाने अनेक भागात हजेरी लावली आहे. आज 23 मे रोजीही विदर्भात ढगाळ हवामान राहणार असून, वादळी वाऱ्यांसह पावसाची शक्यता हवामान विभागाने वर्तवली आहे. तापमानात काहीशी घसरण झाली असून, उकाड्याने त्रस्त असलेल्या नागरिकांना काहीसा दिलासा मिळण्याची शक्यता आहे.

नागपूर, अकोला, अमरावती, वर्धा, चंद्रपूर, गोंदिया, बुलढाणा आणि इतर जिल्ह्यांमध्ये आज कमाल तापमान 35 ते 39 अंश सेल्सिअस दरम्यान असू शकतं. त्याचबरोबर आकाश ढगाळ राहणार असून, विजांच्या कडकडाटासह आणि वादळी वाऱ्यासह मध्यम स्वरूपाचा पाऊस पडण्याची शक्यता आहे. त्यामुळे विदर्भातील सर्वच जिल्ह्यांना पावसाचा येलो अलर्ट जारी करण्यात आला आहे.

अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम, यवतमाळ या सर्वच जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता हवामान विभागानं वर्तवली आहे.

विदर्भात वादळी वाऱ्यासह पावसाची शक्यता असल्याने नागरिकांना प्रशासनाकडून सूचना देण्यात आल्या आहेत. गरज नसल्यास घराबाहेर जाणे टाळावे. विजा चमकत असताना उघड्यावर आणि झाडांखाली थांबणे टाळावे. विजेच्या उपकरणांचा वापर काळजीपूर्वक करणे. प्रशासनाच्या सूचनांचे पालन करणे गरजेचे आहे.

वादळी पावसामुळे शेतीचे आधीच नुकसान झाले आहे. त्यामुळे शेतकऱ्यांना देखील काही सूचना कृषी विभागाकडून देण्यात आल्या आहेत. शेतात असलेली उभी पिकं वाचवण्यासाठी योग्य उपाययोजना कराव्यात. काढणीस तयार असलेलं पिकं सुरक्षित ठिकाणी साठवून ठेवा आणि हवामानाच्या अपडेट्सवर लक्ष ठेवा, असे सांगण्यात आले आहे.