Vidarbha Rain Alert : सोसाट्याचा वारा अन् विजांचा कडकडाट, विदर्भासाठी पुढचे चार दिवस धोक्याचे, हवामान विभागानं दिला अलर्ट

मे महिन्याच्या सुरुवातीपासूनच राज्यात अवकाळी पावसाने हजेरी लावली आहे. वातावरणातील या अनपेक्षित बदलामुळे विदर्भातील विविध जिल्ह्यांमध्ये शेतीचे मोठ्या प्रमाणावर नुकसान झाले आहे.

आज 19 मे रोजीही विदर्भातील हवामान अस्थिर राहणार असून, वादळी वाऱ्यांसह विजांच्या कडकडाटासह पावसाची शक्यता हवामान खात्याने वर्तवली आहे. यामुळे नागरिकांनी आणि शेतकऱ्यांनी खबरदारी घ्यावी, असा इशारा देण्यात आला आहे.

विदर्भातील नागपूर, वर्धा, भंडारा, गोंदिया, चंद्रपूर, गडचिरोली, अमरावती, अकोला, यवतमाळ, बुलढाणा आणि वाशिम या जिल्ह्यांमध्ये हवामान खात्याने येलो अलर्ट जारी केला आहे. या जिल्ह्यांमध्ये तापमान 40 अंशांच्या आसपास राहणार असून, आकाश ढगाळ होण्याची शक्यता आहे. विजांच्या कडकडाटासह मध्यम स्वरूपाचा पाऊस आणि 30 ते 40 किमी प्रतितास वेगाने वारे वाहण्याची शक्यता आहे.

विदर्भातील अनेक भागांत पाऊस होत असूनही उकाडा मात्र कायम आहे. त्यामुळे नागरिकांना अनेक आरोग्याच्या समस्या उद्भवत आहेत.

त्याचबरोबर हवामानातील या बदलामुळे शेतकऱ्यांना मोठ्या अडचणींना सामोरे जावे लागत आहे. फळबागा आणि भाजीपाला पिकांचे नुकसान झाले आहे.

अनेक भागांत वादळी वाऱ्यांमुळे उभ्या झाडांची पडझड झाली असून, पिके जमिनीवर आडवी झाली आहेत. शेतकऱ्यांचे आर्थिक नुकसान मोठ्या प्रमाणात होत आहे.

हवामान खात्याने नागरिकांना अत्यंत आवश्यक असेल तरच घराबाहेर पडण्याचा सल्ला दिला आहे. विजांचा कडकडाट सुरू असताना उघड्यावर थांबू नये, झाडाखाली आसरा घेऊ नये तसेच विद्युत वाहिन्यांपासून दूर राहावे, असे आवाहनही करण्यात आले आहे. पुढील चार दिवस विदर्भात असेच हवामान राहण्याचा अंदाज आहे. त्यामुळे नागरिकांनी आणि शेतकऱ्यांनी सतर्क राहून हवामान खात्याच्या सूचनांचे पालन करणे गरजेचे आहे.