Vidarbha Weather Update: अवकाळी पाऊस गायब,आता विदर्भात थंडीचा जोर वाढणार, पाहा ताज हवामान

राज्यातील वातावरणात अचानक बदल घडून येताना दिसत आहे. राज्यातून थंडीचा जोर ओसरत असतानाच अवकाळी पावसाने हजेरी लावली. त्यानंतर आता पुन्हा एकदा राज्यात थंडीचा जोर वाढणार असल्याची माहिती हवामान विभागानं दिली आहे. विदर्भातही तीच स्थिती असल्याचं बघायला मिळत आहे. विदर्भात अवकाळी पाऊस झाला त्यानंतर आता हळूहळू थंडीचा कडाका वाढतांना दिसून येत आहे.

30 डिसेंबर रोज सोमवारला विदर्भात तुरळक ठिकाणी धूक्यासह ढगाळ आकाश राहून वातावरण कोरडे असणार आहे. तर काही भागांत स्वच्छ सूर्यप्रकाश बघायला मिळणार आहे. विदर्भातील नागपूर, वर्धा, गोंदिया, चंद्रपूर या सर्व जिल्ह्यांतील किमान तापमान 17 अंश सेल्सिअस इतके असण्याची शक्यता आहे. त्याचबरोबर या ठिकाणी धूक्यासह ढगाळ आकाश असणार आहे.

सर्वच जिल्ह्यातील किमान तापमानात पुढील काही दिवसांत घट होण्याची शक्यता आहे. अमरावती, अकोला, बुलढाणा, यवतमाळ, भंडारा या जिल्ह्यातील किमान तापमान 18 अंश सेल्सिअस इतके असणार आहे. त्याचबरोबर या जिल्ह्यांत सुद्धा कुठे ढगाळ आकाश तर कुठे धुके असणार आहे.

विदर्भात पुढील काही दिवसांत किमान तापमानात घट होऊन थंडीचा जोर वाढणार आहे. गडचिरोली किमान तापमान 19 अंश सेल्सिअस इतके असून त्याठिकाणी मुख्यतः निरभ्र आकाश असण्याची शक्यता आहे. वाशिममधील किमान तापमान 19 अंश सेल्सिअस इतके असणार आहे. त्याठिकाणी स्वच्छ सूर्यप्रकाश बघायला मिळणार आहे.

विदर्भातील वातावरणात अचानक बदल घडून येत आहे. आधी अवकाळी पावसाने हजेरी लावली. आता पुन्हा एकदा थंडीची लाट येण्याची शक्यता आहे. शेतकऱ्यांचे तूर पिकं आधीच थंडी आणि ढगाळ वातावरणामुळे खराब झाले आहेत. आता पुन्हा नुकसान होणार का? अशी भीती शेतकऱ्यांच्या चिंतेत आहे. त्यामुळे शेतकऱ्यांनी योग्य ती काळजी घेणे आवश्यक आहे.