Pension Schemes: ज्येष्ठ नागरिकांसाठी बेस्ट आहे ही स्किम, दरमहा मिळतील 9 हजार रुपये

ज्येष्ठ नागरिकांना विविध योजनांची आवश्यकता असते. कारण सेवानिवृत्तीनंतर आयुष्य कसं जगावं, हा अनेक लोकांसमोर प्रश्न असतो. त्यामुळे नोकरी किंवा कुठलाही व्यवसाय करताना उतारवयातील गरजा पूर्ण करण्यासाठी आवश्यक ती पैशांची तरतूद करून ठेवणं गरजेचं असतं.

तशा तर ज्येष्ठांसाठी अनेक योजना आहेत. मात्र ज्येष्ठ नागरिकांसाठी 2017 मध्ये सुरू केलेली प्रधानमंत्री वय वंदना ही योजना अतिशय चांगली मानली जाते. पेन्शन योजनेचा लाभ घ्यायचा असेल तर पंतप्रधान वय वंदना ही योजना बेस्ट ऑप्शन आहे.

यात गुंतवणूक करून दरमहा पेन्शन मिळते. या योजनेअंतर्गत ज्येष्ठ नागरिकांना सामाजिक सुरक्षा आणि नियमित उत्पन्न या दोन्ही गोष्टी मिळू शकतात. LIC च्या वतीनं ही योजना चालवली जाते. अनेक सरकारी, खासगी क्षेत्रातील तसेच बँकांनी पेन्शन योजना बंद केल्या असताना पंतप्रधान वय वंदना या योजनेची सुरूवात करण्यात आली.

या योजनेत विमाधारकाला दरवर्षी 8 टक्के व्याजासह रिटर्न दिला जातो. विमा सुरू असेपर्यंत विमाधारक जिवंत राहत असेल तर पेन्शनच्या रुपात त्याला पूर्ण देय रक्कम दिली जाते. परंतु जर विम्याचा कालावधी पूर्ण होण्याच्या आधी विमाधारकाचा मृत्यू झाल्यास विम्याची खरेदी रक्कम नॉमिनीला मिळते.

कर्ज मिळवण्यासाठीही ही योजना बरीच लोकप्रिय आहे. विमा खरेदी केल्याच्या 3 वर्षांनंतर यावर सहज कर्ज मिळतं. कर्ज घेताना वार्षिक 10 टक्क्यांपर्यंत व्याज घेता येतं. ही योजना ऑनलाइनही खरेदी करता येऊ शकते.

15 दिवसानंतर ही योजना रद्द करता येते. एक लाख 62 हजार रुपये गुंतवणूक केल्यानंतर पीएम वय वंदना योजनेतंर्गत 1000 रुपये पेन्शन मिळवता येईल. या योजनेत जास्तीतजास्त 9,250 पर्यंत पेन्शन मिळू शकते यासाठी 15 लाख रुपयांची गुंतवणूक करणं आवश्यक आहे.

वय वर्ष 60 किंवा त्यापेक्षा अधिक वय असलेल्या व्यक्तीला या योजनेचा लाभ घेता येऊ शकतो. कमाल वयोमर्यादाची कुठलीही अट नाही. योजना पूर्ण होण्याचा कालावधी 10 वर्षे आहे. यात मासिक, तिमाही, सहामाही तसेच वार्षिक आधारावर पेन्शन दिली जाते. तुम्ही नोकरी करत असाल तर निवृत्तीनंतर ही योजना तुमच्या फायद्याची आहे. यातून दरमहा पेन्शन मिळेल.

पंतप्रधान वय वंदना या योजनेचा लाभ घ्यायचा असल्यास ऑनलाइन अर्ज करावा लागतो. सर्वात आधी LICच्या अधिकृत वेबसाईटवर जाऊन ‘ऑनलाईन पॉलिसी खरेदी करा’ यावर क्लिक करावं. त्यानंतर ‘क्लिक हियर टू बाय’ या ऑप्शनची निवड करावी.

यात ‘पीएमव्हीव्हीवाय’ यावर क्लिक करा व ऑनलाइन खरेदीचा ऑप्शन निवडून योजना घेता येऊ शकते. परंतु त्याआधी तुमची पूर्ण माहिती देण्याची आवश्यकता आहे. अर्जात सर्व माहिती भरल्यानंतर ‘पुढे जा’ या पर्यायावर क्लिक करून फॉर्म भरा. आवश्यक ती सर्व कागदपत्रं अपलोड करून ऑनलाइन फॉर्म जमा करता येऊ शकतो व पॉलिसी खरेदी करता येऊ शकते.