सुरमई फ्राय ते पुरण पोळी, खासदार-आमदारांना स्पेशल चांदीची थाळी, शाही उधळपट्टीचे PHOTOS

सोमवारी विधानसभेत एक कार्यक्रम पार पडला. कार्यक्रम होता संसद आणि राज्य विधिमंडळाच्या अंदाज समितीचा. पण या कार्यकर्मात काय घडलं यापेक्षा जास्त चर्चा रंगलीये ती कार्यक्रमाच्या निमित्तानं रंगलेल्या मेजवानीची. कारण मंडळी ही मेजवानी काही साधी-सुधी नव्हती. या मेजवानीसाठी चक्क चांदीच्या ताटांचा थाट मांडला गेला. इतकंच नाही तर प्रत्येक ताटामागे पाच हजार रुपये खर्च केले गेले. त्यामुळे एकीकडे राज्याच्या तिजोरीतल्या खडखडाटाची चर्चा रंगत असताना विनाकारण उधळपट्टीची गरज काय असा सवाल उपस्थित होऊ लागलाय.

चांदीची ताटं,चांदीचे चमचे,चांदीची वाटी आणि या थाळीत सुरमई फ्राय,मालवणी करी,कोथंबिर वडी,बटाट्याची भाजी, दहीवडे आणि पुरळपोळी असा शाही मेनू असलेली शाही मेजवानी नुकतीच मुंबईत पार पडली.

निमित्त होतं संसद आणि राज्य विधिमंडळाच्या अंदाज समितीच्या सदस्यांसाठी आयोजित मेजवानीचं. या मेजवानीसाठी वापरण्यात आलेल्या एका ताटाचं दिवसाचं भाडं तब्बल 550 रुपये...तर एका थाळीचा दर चार हजार रुपये. अंदाज समितीचे अध्यक्ष आणि 250 सदस्य शिवाय 350 अधिकारी अशा एकूण सहाशे अतिथींनी या मेजवानीवर ताव हाणला..

अंदाज समिती आणि वाद असं जणू काही समिकरण झालंय. संसदेच्या अंदाज समितीच्या स्थापनेला ७५ वर्ष पूर्ण झाल्यानिमित्ताने विधानभवनात आयोजित कार्यक्रमात राज्यभाषा असतानाही मराठी वगळता इंग्रजी आणि हिंदीचं दर्शन घडल्यानं राजकारण पेटलं होतं.

तर काही दिवसांपूर्वी धुळ्यात विधीमंडळ अंदाज समिती दौऱ्यावर आली होती. यावेळी शासकीय विश्रामगृहाच्या खोलीत पाच कोटी असल्याचा आरोप अनिल गोटेंनी केला होता. त्यानंतर पोलिसांच्या चौकशीत एक कोटी ८४ लाखांची रोकड आढळून आली होती. त्या प्रकरणी एसआयटी चौकशीची घोषणाही राज्य सरकारनं केली. विधीमंडळाच्या अंदाज समितीतीतील शाही मेजवानीवरून विरोधकांनी निशाणा साधला.

संसदेच्या आणि विधिमंडळाच्या अंदाज समितीच्या केवळ जेवणावरचं नाही तर त्यांच्या राहण्या फिरवण्यावर मुक्तहस्ते खर्च करण्यात आल्याची चर्चा आहे. विशेष पाहुण्यांच्या निवासाची सोय हॉटेल ताज पॅलेस, तर त्यांच्यासोबतच्या अधिकाऱ्यांची हॉटेल ट्रायडंटला करण्यात आली होती. तसंच परिषद संपल्यानंतर मुंबई सहलचंही आयोजन करण्यात आलं होतं.

या उधळपट्टीवरून राजकीय गदारोळानंतर सरकारकडून सारवासारव करण्याच प्रयत्न केला गेला. त्या मेजवानीत वापरण्यात आलेली ताटं चांदीची नव्हती असा खुलासा विधीमंडळातील सुत्रांनी केला.

व्हाईट मेटल आर्टिफिशियल ताट असल्याचे विधीमंडळाचे म्हणणे आहे. तसंच जेवणाचे दरही निम्म्याहून कमी असल्याचा दावाही केला जातोय. मात्र कुणी अधिकृत प्रतिक्रिया देण्यास पुढं आलं नाही. विशेष म्हणजे, सत्ताधारी पक्षाचे नेतेही याबाबत हातचं राखून प्रतिक्रिया देताना दिसले.

एखाद्या समितीच्या सदस्यांसाठी जेवणाची व्यवस्था करण्यात काही गैर नाही. पण त्यासाठी चांदीच्या ताट-वाट्यांचा सोस कशासाठी असा प्रश्न सर्वसामान्यांना पडला. राज्यावर कर्जाचा डोंगर असताना कुठे गावापर्यंत रस्ता नसल्यानं गर्भवती महिलेला झोळी करून घेऊन जाण्याची वेळआल्याची घटना शहापूरसारख्या भागात घडतात.

राज्यातील सोयीसुविधांसाठी आणि जनकल्याणकारी योजनांसाठी खर्चाची तजवीज करताना सरकारला तारेवरची कसरत करावी लागत असताना अशा प्रकारे जनतेच्या पैशाची उधळपट्टी करणं कितपत योग्य असा सवाल उपस्थित केला जातोय.