Weather Alert: थंडीची लाट! सोलापुरातील या ठिकाणी पारा घसरला, तापमान 9 अशांच्या खाली!

उत्तरेकडील शीत वाऱ्यांचे प्रवाह महाराष्ट्रात येवू लागल्याने गारठा वाढला आहे. उत्तर महाराष्ट्रात थंडीची लाट टिकून असल्याने हुडहुडी कायम आहे. यामुळे राज्यात गारठा वाढत असून आज 15 नोव्हेंबर रोजी राज्यातील थंडीचा जोर वाढण्याची शक्यता आहे. जळगावसह राज्यात काही ठिकाणी थंडीच्या लाटेचा इशारा हवामान विभागाने दिला आहे. पश्चिम महाराष्ट्रातील अपडेट जाणून घेऊ.

पुणे जिल्ह्यात शुक्रवारी 29.8 कमाल आणि 12.7 अंश सेल्सिअस किमान तापमान नोंदविण्यात आले. आज पुणे जिल्ह्यातील कमाल तापमान 30 अंशावर राहील. तसेच किमान तापमानाचा पारा 11 अंशापर्यंत घटणार असल्याने पुण्यात थंडी वाढण्याची शक्यता आहे.

साताऱ्यात गारठा वाढत असून धुक्यासह दव पडत आहेत. शुक्रवारी साताऱ्यातील कमाल तापमानाचा पारा 30.2 अंशावर राहिला. तर 14.4 अंश सेल्सिअस किमान तापमान राहिले. आज सातारा जिल्ह्यात किमान आणि कमाल तापमानात अंशत चढ-उतार होऊन 15 ते 30 अंश सेल्सिअस दरम्यान राहील.

कोल्हापूरमध्ये दिवसाची सुरुवात साधारण 18 अंश सेल्सिअसच्या किमान तापमानाने होईल. तर कमाल तापमानाचा पारा 30 अंशांवर जाण्याची शक्यता आहे. कोल्हापुरात सकाळी थंडी तर दुपारी उन्हाचा चटका अशी स्थिती अनुभवायला मिळत आहे.

सोलापूर जिल्ह्यातील जेऊर येथे राज्यातील निचांकी 9 अंश सेल्सिअस तापमान नोंदले गेले. शुक्रवारी 31.6 अंश सेल्सिअस कमाल तापमानाची नोंद झाली. आज कमाल तापमानात अंशत: वाढ होऊन पारा 32 अंशावर राहील. तसेच किमान तापमानाचा पारा 16 अंशापर्यंत राहील.

सांगली जिल्ह्यात मागील 24 तासात 15.6 अंश सेल्सिअस किमान तापमानाची नोंद झाली. आज जिल्ह्यात कमाल तापमान 30 अंशावर राहील. तसेच किमान तापमान 16 अंशावर राहील. सांगलीत पहाटे थंडीचा कडाका आणि दुपारी उन्हाचा चटका अशी स्थिती राहील.

राज्यात गारठा वाढत असून, पहाटे धुक्यासह दव पडल्याचे चित्र कायम आहे. पश्चिम महाराष्ट्रातील काही जिल्ह्यांत किमान तापमानात चढ-उतार होत आहेत. मात्र थंडीचा कडाका कायम राहण्याची शक्यता हवामान विभागाने वर्तविली आहे. पहाटे थंडी, दुपारी कडक ऊन आणि रात्री परत गारठा जाणवत असल्याने नागरिकांनी आरोग्याची काळजी घ्यावी.