Weather Alert: सप्टेंबरच्या सुरुवातीलाच वारं फिरलं, सोमवारी धो धो कोसळणार, 17 जिल्ह्यांना अलर्ट

ऑगस्ट महिन्यात राज्यातील सर्वच भागांत जोरदार पाऊस झाला. ऑगस्टअखेर पावासाचा जोर काहीसा ओसरला. परंतु, सप्टेंबरच्या सुरुवातीलाच हवामानात मोठे बदल जाणवत आहेत. 1 सप्टेंबर रोजी कोकण, घाट माथा परिसर, मराठवाडा आणि विदर्भात वादळी वाऱ्यासह पावसाची शक्यता वर्तवण्यात आली आहे. राज्यातील 17 जिल्ह्यांना पावसाचा यलो अलर्ट जारी करण्यात आला आहे. पुढील 24 तासांचा हवामान अंदाज जाणून घेऊ.

कोकण विभागातील पालघर, ठाणे, मुंबई या तीन जिल्ह्यांत मध्यम स्वरूपाच्या पावसाची शक्यता वर्तवण्यात आली आहे. तर रायगड, रत्नागिरी, सिंधुदुर्ग या जिल्ह्यांत मुसळधार पावसाची शक्यता असल्याचं हवामान विभागाकडून सांगण्यात आलं आहे. या तीन जिल्ह्यांना पावसाचा यलो अलर्ट जारी करण्यात आला आहे.

पश्चिम महाराष्ट्रातील पुणे, कोल्हापूर, सातारा, सांगली, सोलापूर या जिल्ह्यांत हलक्या ते मध्यम स्वरूपाच्या पावसाची शक्यता वर्तवण्यात आली आहे. तर पुणे, कोल्हापूर आणि सातारा घाटमाथा परिसरात मुसळधार पावसाची शक्यता असल्याने यलो अलर्ट जारी करण्यात आला आहे.

मराठवाड्यातील छत्रपती संभाजीनगर, जालना, परभणी, हिंगोली, नांदेड या जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. या जिल्ह्यांना पावसाचा यलो अलर्ट जारी करण्यात आला आहे. बीड, लातूर, धाराशिव या जिल्ह्यांत हलक्या ते मध्यम स्वरूपाच्या पावसाची शक्यता हवामान विभागाकडून वर्तविण्यात आली आहे.

उत्तर महाराष्ट्रातील नाशिक, धुळे, नंदुरबार, जळगाव आणि अहिल्यानगर या जिल्ह्यांत हलक्या ते मध्यम स्वरूपाच्या पावसाची शक्यता वर्तवण्यात आली आहे.

विदर्भातील नागपूर, भंडारा, चंद्रपूर, गडचिरोली, गोंदिया आणि वर्धा जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. त्यामुळे या जिल्ह्यांना पावसाचा यलो अलर्ट जारी करण्यात आला आहे. अकोला, अमरावती, बुलढाणा, वाशिम आणि यवतमाळ या ठिकाणी कुठलीही पावसाची शक्यता नाही.

राज्यात 1 सप्टेंबर रोजी अनेक भागांत हलक्या ते मुसळधार पावसाची शक्यता वर्तवण्यात आली आहे. कोकण, घाटमाथा, मराठवाडा आणि विदर्भातील काही जिल्ह्यांना हवामान विभागाने यलो अलर्ट दिला आहे. काही ठिकाणी वादळी वाऱ्यासह विजांच्या कडकडाटाची शक्यता असल्याने नागरिकांनी काळजी घेणे गरजेचे आहे.